La Usc di Ladins

Al é passé feter söle de n ann, da canche l’Istitut Ladin "Micurá de Rü" á pié do l’archif fotografich storich di fotografs Zardini da Cortina d’Ampëz. Na arpejun de passa 300.000 fotografies che vá dai pröms agn dl 1900 cina al 2019. Passa n centená, olache al é gnü documenté te na manira imprescionanta y alüsc dër menüda, sciöche la "cira" de Cortina s’á mudé cun i tëmps. Un di evënc che á stramudé la contrada dla "reina dles Dolomites" é zënzater chël di Jüc Olimpics dl 1956: les prömes Olimpiades che gnô trasmetüdes en direta tles televijiuns internazionales. N evënt che mostra sciöche benedisciun y maledisciun pó alüsc s’aziché la man, deache por Cortina él sté de un n vers n gran svilup, mo baldi ince le mëteman dla ferata speculativa sön le teritore y cun ël l’inforestimënt dl paisc che i conesciun ince massa bun. Te chësc 2026, é les Olimpiades indô rovades t’Ampëz. Tröp é sambëgn desfarënt respet a dan 70 agn, mo danterite él ince cotan de similarités. T’Istitut Ladin él gnü daurí en vëndres la mostra "Il Terreno dei Giochi", curada da Silvia Baccanti y Beatrice Citterio, che fej na cuntraposiziun fotografica dantes i Jüc da laota y da incö. Lapró él gnü presenté n catalogh, che vá plü sot sön tematiches desvalies y dëida da se senté ite tl contest. Na mostra – cis por chi che á a cör la tera ladina – che descëda certes emoziuns. Ara é daverta cina ai 24 de ma, vigni de dales 10:00 ales 12:00 y dales 15:00 ales 19:00.

Deplü t’La Usc di Ladins di 22 de ma

 (pablo)