La Usc di Ladins

N ann da truep ntervënc ie stat chësc ultimo per i Destudafuech de Sëlva y tosc ruveràl n auto dal tanch nuef te si magasin. Repurton dla senteda generela che ie unida fata ala fin dl 2019.
Toni Mussner, che resta inant cumandant, à rengrazià chëi che ie zapei ora de cunsëi, sambën duc i uemes y tanc che juda cun aiuc y cuntribuc I Destudafuech de Sëlva à fat si generela cun la veles dl cunsëi nuef, che menerà la lia ti cin’ ani che vën.


Veles dl cunsëi nuef
Sun l ordn dl di de chësta senteda generela fòvel nce la veles dl cunsëi nuef per i cin’ ani che vën nchin al 2025: cumandant resta inant Toni Mussner, si vize resta Urban Mussner, cumandant de cumpania (Zugskommandant) ie Andreas Perathoner, si vize ie Askan Comploi, coche magasinier iel unì lità Thomas Mussner (Val), cassier resta Karl Lardschneider, coche scrivan nuef iel unì lità Michael Oberhollenzer. I cumandanc de grupa che ie unii litei ie Theo Demetz, Ivan Senoner y Daniel Bernardi. Marco Burger ie unì lità te cunsëi sciche respunsabl di sciaferes.

N gran rengraziamënt da pert dl cumandant Toni Mussner ti va a Georg Hofer, che ie stat 25 ani te cunsëi coche scrivan, a Norbert Mittermaier che à fat 20 ani alalongia l magasinier, a Moritz Ambach Mussner che ie stat 5 ani vizecumandant de cumpania (Zugskommandantsellvertreter), a Harald Perathoner che ie stat 5 ani cumandant de grupa y a David Senoner che ie stat 10 ani cumandant de grupa. Chisc uemes ne se à nia plu metù a despusizion per l cunsëi, ma resta for coche uemes di destudafuech tla grupa a fé si atività per l bën dl luech de Sëlva.

N gra de cuer ti ie da pert dl cumandant nce jit a duc i uemes, speran che l cunsëi nuef lëure bën deberieda.

Nia per ultim ti iel mo unì sentì gra a duta la istituzions publiches y privates che juda a finanzië l’atività di destudafuech y ala jënt de Sëlva, che se desmostra for inò de mania lergia canche la se trata de dé vel’ dunfierta o cuntribut.

L articul ntier ie da liejer tla edizion stampeda di 10 de auril.

Foto: L cunsëi nuef di Destudafuech de Sëlva.

I Destudafuech de Sëlva