La Usc di Ladins

Canche l balon encontra strèdes desvalives, canche l balon auza fora messajes positives e valores segn. L é possibol, e no demò te nosc picol olache sion belebon usé a l veder desche n strument de crescimonia san per nesc joegn, ma ence a livel nazionèl olache semper de più l mond del balon se ciarea de scandoi, de pegnes, de scioldi. I ejempies positives i é stac porté enstadì a Cianacei olache, tel chèder di evenc de Ispirazions d’istà 2025, la rassegna endrezèda da la Comiscion per la cultura de la parochies de Fascia, l é ruà la Nazionèla Talièna Monies de balon. En mèrtesc ai 29 de messèl domesdì l é stat endrezà na partida de balon sul ciamp de Cianacei anter la squadra de monies e na raprejentanza de ex jiadores eles del Fascia Balon.
Da sera enveze te piaz Marconi la monies, ensema al mister Moreno Buccianti, domanèdes fora da Elisa Salvi, les à portà dant sia testimonianza de vita e de sport.

»Volon ge dèr detetorn al balon sia pureza«

»Nos sion chela monies che à responet al envit de Papa Francesch de jir fora dai convenc, de esser na gejia che se verc, nos sion jites fora col balon sot l brac – à dit Suor Silvia Carboni. L é na gran endesfida percheche vegnon dal mond del balon di egn ’90 che l era demò pascion, aldidanché chest mond l é stat roinà, i joegn che taca a jièr i muda i parametres del sport e chest ne fèsc mèl.«

»Nos, che sion monies ma aon dutes n passà leà al jech del balon – à dit la capitana de la squadra suor Annika Fabbian – volon portèr sul ciamp i valores positives del sport: chel de l’amicizia, che l é fondamentèl ence anter de nos che vegnon da lesc desvalives de la Tèlia, e chel de la condivjion ajache ence nos fajon pèrt de congregazions desferentes.«
Suor Silvia à portà dant sia testimonianza leèda ai joegn. L president del Cagliari Calcio ge à domanà defat de ge stèr do per i didèr a se la fèr ca te chest mond olache l é na forta prescion, olache i vegn tiré su con tel cef demò l balon e la cariera e se no i ge la fèsc a jir inant i va en deprescion. »Nos i didon a se creèr n pian B – à contà suor Silvia – tel sens che ge fajon entener che no l é demò l balon te la vita, che se no i é bogn de doventèr campions i pel semper fèr zeche de auter, che ence se no i é bravi i va inant istesc.

De più su La Usc stampèda de en vender ai 8 de aost del 2025  (Monica Cigolla)