La Usc di Ladins

Fá lifc nüs danter Reba, Andrac y Ampëz, por colié diretamënter Cortina ala Roda dl Sela! Al é na idea che á ciafé tröp ressonn ultima­mënter ti media belunesc, aunejians y ince a livel nazional. Ma che l'idea n'é nia de nü y de genial. De nü y de genial foss finalmënter n conzet che ciara tl dagní, na »vijiun«, por la viabilité y mobilité te chëstes valades de munt. Cortina d'Ampëz ará tosc i Mondiai y spo les Olimpia­des da d'invern, y ciamó n'á i politics regionai y locai nia sön mësa na rezeta co che ai afrontará l'azes ai paisc y ales gares, y cun ci mesi. Ciamó él tëmp, pënson, mo assá nen n'él pa mai!
Strotöres y sistems de viabilité y mobilité vára da odëi danfora – chësc é ince da ponsé, mo chël ater aspet nia: le tëmp y la natöra tles munts. I sperun düc de por de che al ne suzedes nia, che la nëi y le terac ne slisorëies nia, che rüs ne vais nia porsura, che le vënt y les noveres nes straverdes da prighi y danns – ma che i ultimi agn unse messü vire sön nosta pel deplü catastrofes naturales che á condizioné nostes ativités y nosta vita. Unse imparé val'? Sunse sëgn arjigná?
Denanche ponsé inant a de gran espanjiuns de lifc y pistes por colié inant valades intieres jissel debojëgn da mioré les condiziuns dl potenzial che i ún bele, por podëi garantí inant la cualité di sorvisc y dles strotöres che é dan man, y nia da ciaré da costruí lapró zënza na planificaziun sana dl teritore. Ci n'él pa pordërt dla ferata tan laldada che podess n de gní reativada da Toblach a Cortina y inant y zoruch a Cialauz/Calalzo? Dan trëi mëisc á la Regiun Venet anunzié intervënc por eletrifiché la ferata Belun–Cialauz y laurs por potenzié y amodernisé la ligna y les staziuns – chësc, en previjiun dles Olimpiades 2026. Suzedaral pa?
Interessant él da lí do tla storia che les Olimpiades dl 1956 a Cortina ne foss nia stades poscibles zënza la ferata Toblach–Cialauz, che trasportâ al de chi 7.000 atlec y spetadus. Chësta ferata á spo fat so ultim iade de ma dl 1964. Iló án spo miné che al é miú sce an investësc te petun!  (de Iaco Rigo)