La Usc di Ladins

No l’à soscedà gran marevea te Fascia la neva vegnuda fora te l’ultim fin de setemèna che la Procuradora del Comun general Elena Testor, litèda al Senat del 2018 con Forza Italia, l’à lascià l partit de Silvio Berlusconi per jir te la Lega de Matteo Salvini.

L leam con la Lega da man de Elena Testor e de duta la Sociazion Fassa l’é semper stat strent, e ela medema del 2013 la era stata candidèda a la Cambra ensema con Fugatti te la lista de la Lega, vidèda enlouta a livel nazionèl da Maroni.

L passaje à soscedà ben segur vèlch critica e cusa de aer »mudà viesta«, ampò Testor l’à sotrissà de esser passèda a la Lega ajache chest, per so cont, l’é n partit più vejin ai teritories. La Procuradora de Fascia à anunzià na conferenza stampa per despieghèr miec sia rejons, ampò fin canche nosc sfoi é jit en stampa no l’é stat l met de la sentir diretamenter per se fèr dir vèlch de più.

Ence l conseier provinzièl ladin Luca Guglielmi, te sia encèria de secretèr politich de la Sociazion Fassa, à comentà positivamenter l passaje de chela che l’é stat la presidenta de chest grop politich de val dal 2012 al 2018, sotrissan che ampò la colocazion politica de la senatora fascèna resta semper chiaramenter tel »contegnidor valorial del zenter dreta a chel che ence l statut del moviment che raprejente desche Secretèr politich tol ispirazion«. Sia dezijion de mudèr partit a livel nazionèl vegn da rejons personèles e organisatives – à scrit amò Guglielmi – ma l’é da sotrissèr nosc orgolie per l lurier che Elena Testor à portà inant e per coche la raprejenta noscia realtà a livel nazionèl.

L passaje é stat tout sù con gran gaissa da la Lega del Trentin con sie secretèr politich Mirko Bisesti, segur con manco gaissa da Forza Italia con sie coordenador regionèl Giorgio Leonardi, che aea jà perdù da sia squadra ence Donatella Conzatti.  (LG)