La Usc di Ladins

La maladoranza sessuala vegn dant te duc i raions y é n problem coletif. Dantaldut tles families y tl entourage sozial plu intim y strent él da ciafé tles statistiches cotant de caji y persones atochedes, y ence te scola, gliejia, sport, yii. I numeri di caji varieia samben da raion a raion.
Les zifres de maladoranza de chest vers é autes. L’OMS (organisazion mondiala dla sanité – WHO) arata che al sie tla Germania chel milion de mutans y mutons che à vivù, o viv dutorela, violenza sessuala. Chest é per classa de scola (da 20 scolés) da 1 a 2 mutons. Tl’Austria él gnu metù su dl 2010 la "Klasnic-Kommission" che á enchin en chest ann tout su y analisé deplù milesc de caji.

L liber y l film
L rejist Lembergh ne chier nia acuses personales o istituzions che à scoté via, o scota via, caji de maladoranza sessuala, maltratament de mutons y violenza a dann di plu debli dla sozieté. L fin dl liber (che dess gnì fora dl 2022 dal Editur Raetia) y dl film dla produzion Albolina é da lascé audì les persones maladoredes y anuzedes tres intervistes y encontedes discretes, chest per sensibilisé la sozieté y les families per n tema che é tres ciamò tla coletivité n gran tabù. L rejist Georg Lembergh pò gnì contaté tres telefon o e-mail, al numer +43 664 450 75 63 y miscion  office@georglembergh.com