La Usc di Ladins

La setemèna passèda ence Dolores Dariz, presidenta de la Consulta Ladina del Comun de Busan e Sabina Willeit, presidenta de la Comunanza Ladina a Busan, à abù l’onor e l gran piajer de rengrazièr e de ge sporjer i augures de dut l bon a l’artista ecletica Veronica Zanoner Piccoliori che à festejà da pech la bela età de 98 egn.
Veronica Zanoner, descheche aon podù lejer te l’ultima edizion de La Usc di Ladins, l’à l’èrt tel sanch. La pascion de depenjer, de zipièr, de scriver poejìes e contìes à segnà sia vita e la ge à lascià a la cultura ladina n’arpejon de operes leterères e de operes d’èrt de gran valor. Ensema a so om, Luigi Piccoliori, no i é stac demò anter i prumes colaboradores, ite per i egn ’50 e ’60, de la Radio Ladina te la Rai de Busan, ma ence anter chi che à sotescrit la costituzion de la Comunanza Ladina de Busan, ai 15 de mèrz del 1978 e i l’à sostegnuda ti egn dò.
Ne resta da dir, stimèda e cara Veronica, amò n’outa de cher develpai per esser n ejempie de gran segnificat per l mantegniment e l svilup de Voscia reijes ladines sun cheles che dapò l’é fiorì duta Voscia èrt.

Podede troèr na poejìa de Veronica Zanoner te La usc 04 di 29 de jené