La Usc di Ladins

Tel dì dedicà al Sènt da Oies, ai 29 de jené, te la gejia de Poza don Andrea Malfatti à metù a jir na bela celebrazion eucaristica. Dedant a la reliquia de Sèn Giosef Freinademetz, donèda a la Val de Fascia del 2017 per volontà de monsegnor Luigi Bressan, enlouta arzipiscop de Trent e metuda sun utèr per l’ocajion, don Andrea à domanà l’intercescion del prum sènt ladin per duta la valèdes ladines, che les é amò dò a viver tempes senestres tant per la sanità che per l’economìa. La messa é stata conzelebrèda da don Erminio e dal diacon Antonio e viventèda con la cianties del cor di joegn e con orazions ence per ladin dal Grop Miscionarie fascian che porta l’inom Freinademez en onor del sènt badiot.

Endèna la zelebrazion don Andrea à recordà la fegura del miscionarie e sia atività te la Cina e l’à rejonà de la reliquia “ex arca sepulchralis”, con n tochet de legn del vascel olache Sèn Giosef Freinademez era stat sepolì e di segnificac del porta reliquia, che l’é stat zipià te Fascia e depent vin Gherdena per simbolisèr l leam anter la valèdes ladines. Fat con la foja di crepes del Grop del Sela l porta l simbol de l’orden di Verbic e na pagoda; te mez l’é na crousc, che per ogne cristian l’é l pont stabol, e al zenter de la crousc l’é stat metù la reliquia.

Don Malfatti à recordà che Freinademetz l’é l prum sènt ladin, e l’à dit che se spera che prest posse vegnir canonisà ence don Heinrich Videsott, ma che ampò l’esser sènc, aldelà de la canonisazion, cogn esser l’obietif de duc i cristiegn.

I fidei se à metù te la mans de Sèn Giosef Freinademetz e de Sènt’Ugèna patrona de Fascia, domanan aiut per renforzèr l spirit miscionarie, per la vocazions e per la sanità e l benstèr de la jent de la valèdes ladines e de dut l mond.

 (Lucia Gross)