La “trilogia“ de Cesare Poppi premièda al Filmfestival

Data

08 de mei 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L regoi di studies de l’antropologh, rencurà ti egn passé da Fabio Chiocchetti e Davide Ermacora e dat fora da l’Istitut Cultural Ladin, se à vadagnà la  segnalazion al Pest Itas del liber da mont.

Sarà insnet da les 20.30 inant, da poder veder ence en streaming, l moment de la proclamazion ofiziala di venjidores del Filmfestival de Trent 2021.

Tel chèder de l’emportant event culturèl trentin, n post de gran rilief ge pervegn ence al Pest Itas del liber da mont, nasciù acà 50 egn.

Apontin te chest Pest, olache à tout pèrt 110 operes e che é stat vent da Marco Albino Ferrari con l liber “Mia sconosciuta“,  a venjer la segnalazion per i libres dac fora tel Trentin l’é stat i “Saggi di antropologia ladina“ de Cesare Poppi, dac fora te trei volumes anter l 2019 e l 2020 da l’Istitut Cultural Ladin.

La jurìa à conscidrà chesta publicazion, rencurèda da Fabio Chiocchetti, enlouta diretor de l’ICL, e dal professor Davide Ermacora, antropologh furlan arlief de Poppi che ades ensegna te la Scola de Fascia, “na opera monumentala che regoi studies e enrescides che l’antropologh Cesare Poppi ge à dedicà a la cultura pèopulèra de la comunanza ladina de Fascia. L’opera – vegn scrit amò – tol ite e va a fon te tematiches e ambic desferenc: da la storia a la testimonianzes a ousc; la ritualità e i mic; la tradizions e la cultura materiala; l lengaz e i aspec storich-soziologics e identitères.“

En domenia ai 9 de mé da les 11 fin les 12.30 l’é en program na scontrèda con duc i venjidores del Pest ITAS 2021, ence chesta da poder veder en streaming dal sit del Filmfestival de Trent.

Chest’opera é definida da la jurìa “n document fondamentèl tel consolidament de la costituzion de l’identità ladina e referiment prezious per studié e cultores de la materia, per dozenc e studenc de la Scola ladina en particolèr, che se met dant desche strument didatich e del saer.“

Segur n bel recognosciment, che segna l coronament de passa 40 egn de studies e enrescides de l’antropologh amich di ladins e del lurier prezious per la cultura e l’identità de Fascia portà inant te chi medemi egn da l’Istitut Cultural Ladin.

 (Lucia Gross)