La Usc di Ladins

L’é enteressant veder che l debatit sul raport anter cultura, identità e turism, tem che vegn portà inant da n muie de egn ti ambienc de la cultura ladina, e da n trat ence te chi del turism, doventa ades protagonist de na sera de messèl che se ouc soraldut ai ghesć che rua te Fascia.

L’é sozedù en lunesc ai 5 de messèl, tel secondo apuntament de la rassegna proponeta per l’istà dal Comitat Manifestazion »Enjoy Poza« col coordenaament de la giornalista Virna Pierobon, che à cernù desche titol per la lingia de scontrèdes »Angern, anché e doman. Sul troi de la reijes ladines«.

A dejoujer l tem emportant e articolà l’é stat envià la diretora de l’Istitut Cultural Ladin Sabrina Rasom e l diretor de l’Azienda de Promozion Turistica de Fascia Paolo Grigolli, doi profescionisć che à tout sù da pech temp sia encèria a la vida de chesta doi realtèdes de gran peis e prestije de Fascia.

La sera endrezèda te sala de Comun de Sèn Jan l’é n segn che i tempes é mudé, che i neves responsaboi de la cultura e del turism ge dèsc maor emportanza a la comunicazion se vadagnan maor lèrga tel calandèr di evenc, ti media e ti social ma ence – amancol l’é da sperèr – che la sensibilità e la consaputa che la cultura e l’identità l’é n ben prezious ence a livel economich, descheche vegn dit da egn dai esponenc de la cultura ladina, é cresciudes te la comunanza e te anter i operatores turistics e economics.

De più sui contegnui de la scontrèda é da poder lejer su La Usc stampèda de vender ai 9 de messèl. 
La rassegna del Comitat manifestazions de Poza va inant en lunesc ai 12 de messèl da les 21.00 te sala del Consei de Comun de Sèn Jan a Poza, olache vegnarà rejonà de ambient e davegnir sostegnibol con Norbert Lantschner.  (Lucia Gross)