La Usc di Ladins

L’Asia süd-orientala é tl laur da deventé a na mainira asvelta la regiun plü atocada dal Covid-19, cun na percentuala de infeziuns che superëia chëres de America Latina y India. La varianta Delta, somada al avanzamënt pegher dles vazinaziuns te gran pert dla regiun, á gaujé n aumënt di caji de zirca le 37% tla utlima edema cun 127.000 caji al de. Chësta é la plüra de "Save the Children", l’Organisaziun internazionala che combat da passa 100 agn por salvé i mituns tl prigo y ti garantí n dagní, che manifestëia gran festide por l'impat catastrofich che la pordüda de vites y de mesi de sussistënza ará söi mituns dla regiun, bele restá indó a gauja dla stlüta dla scora y di sorvisc sanitars essenziai, tut ite les vazinaziuns de routine.

"Le Covid-19 se desleria fora desco n fogatun tl Süd Ost Asiatich y le piec á ciamó da gní. Chësc é un di raiuns cun le numer plü bas de variores, mo ince de tests y al é donca dër probabl che la situaziun sides plü crödia co ci che i sciazun. I modí epidemiologics prevëiga che an pó rové tla Asia süd-orientala cina a 2,3 miliuns de contaji y a 4.500 morts al de, cun plü dl mez dles infeziuns y dles morts ma bele tla Indonesia. Lapró él da s’aspeté che la situaziun vëgnes piec te Statesc sciöche Thailandia y Filipines, olache i modí sciazëia che al podess gní arjunt bëgn chi 75.000 caji nüs al de tla spana de tëmp danter fin de messé y mëteman de agost", á detlaré le dotur Yasir Arafat, mede y espert de sanité publica y consulënt tecnich de "Save the Children" por la resposta al Covid-19 tl’Asia. "Cina sëgn é i mituns gnüs tuc püch en conscidraziun ti planns de prigo dla pandemia, scebëgn che la realté bate notizia. Te paisc sciöche l'Indonesia ne registrëion nia ma numeri récord di mëndri – vitimes dl virus, m al é ince n aumënt alarmant de mituns che n’á nia azes ales vazinaziuns de routine y ala spëisa fondamentala por süa suravivënza, ci che descëda davëi festide. Al é tler che i mituns ará da sćiampí di tl dagní por les conseguënzes de chësta pandemia".

"Save the Children" damana na aziun coletiva tempestiva por smendrí le forgnun danter i paisc de bëgnester y chi dla meseria, garantin n azes global ales variores cuntra le Covid-19 tres COVAX y l’adoranza de know-how, dles informaziuns y dles tecnologies che vá debojëgn por che i paisc pois finalmënter s’arjigné instësc le vazin tan ütl.  (Iaco Rigo)