La Usc di Ladins

En previjiun dl scomenciamënt dl ann de scora 2022/23 él gnü da püch comuniché les dates por l’iscriziun dles scolares y di scolars ales scores ladines (primares, mesanes, altes y scora profescionala por l’artejanat artistich da Urtijëi). Les normes che regolamentëia l’iscriziun ales scores é dades dant tla deliberaziun dla Junta Provinziala di 14.12.2021, nr. 1083; aladô de chësta mëss les iscriziuns gní fates cun la modalité online.

Scora elementara, iscriziuns dai 10 de jená

I geniturs y les porsones responsables por l’educaziun dla möta/dl möt mëss scrí ite ala pröma classa dla scora elementara les mitans y i mituns che complësc 6 agn anter i 31 de agost dl 2022. Les mitans y i mituns che complësc 6 agn anter i 30 de aurí dl 2023 pó gní scrites/scric ite ala 1. classa dla scora elementara. Les iscriziuns vëgn fates dai 10 ai 24 de jená 2022.
La domanda de iscriziun mëss gní menada ala scora de competënza teritoriala. Ara pó ma gní presentada te öna na scora. Les iscriziuns dles mitans y di mituns tles classes dessura vëgn fates d’ofize. I geniturs y les porsones responsables por l’educaziun che oress scrí ite te caji ezezionai les mitans/i mituns te na scora de n comun confinant, pó contaté l’Intendënza Ladina anter i 20 de dezëmber dl 2021 por ciafé indicaziuns aladô. Mituns y mitans che vir te comuns confinanc cun la Provinzia da Balsan pó ma gní scric ite te na scora de Südtirol tres domanda sön papier.

Scora mesana, iscriziuns d’ofize

Les mitans y i mituns dles cuintes classes dla scora primara vëgn scrites/scric ite d’ofize tla pröma classa dla scora mesana dla respetiva direziun raionala o dla scora competënta por le teritore. I geniturs y les porsones responsables por l’educaziun dla möta/dl möt pó damané le trasferimënt te n’atra scora mesana.

Scora alta y profescionala, iscriziuns dai 15 de jená inant

Les iscriziuns ala 1. classa dla scora alta o profescionala é da presenté online tla perioda dai 15 de jená ai 15 de forá 2022. Les iscriziuns ales classes dessura vëgn fates d’ofize. Le formular d’iscriziun por les classes dessura (p.ej. por l’ann de formaziun che se röia cun l’ejam de Stat dla scora alta) mëss gní dé jö online. Les scolares y i scolars che ala fin dl ann de scora ne vëgn nia ametüdes/ametüs ala classa dessura vëgn indô scrites/scric ite d’ofize tla medema classa, sce la familia ne se damana nia le trasferimënt te n’atra istituziun scolastica.

Iscriziuns online: les informaziuns

Les scolares y i scolars vëgn porchël scrites/scric ite ala pröma classa dla scora primara, dla scora alta y dla scora profescionala tres le sorvisc online dl’aministraziun provinziala myCivis anter i termins dá dant; le sorvisc pó gní anuzé tres chësc link: https://my.civis.bz.it/schuleinschreibung
Informaziuns en cunt dles iscriziuns é da ciafé sot a chësc link: https://www.provinz.bz.it/schuleinschreibungen
Chëstes plates internet pita dötes les informaziuns che an adora por les iscriziuns. L’azes al sorvisc online é poscibl tres SPID o cun la Cherta di sorvisc ativada (cherta sanitara börna cun software y letur).

Novité: SPID pó atualmënter gní ativé tla maiú pert di Comuns. Les istituziuns scolastiches é periades da ti pité ales families assitënza por alisiré l’iscriziun. Ales families che n’á degun computer o degöna conesciun internet ti pita l’istituziun scolastica, a chëra che al ti vëgn mené la domanda d’iscriziun, n computer y i injins nezesciars por fá l’iscriziun.