La Usc di Ladins

Roland Riz s’á plü co 30 agn alalungia dé jö con i problems de Südtirol y á combatü por arjunje na bona autonomia. Ince por i ladins s’á Roland Riz dër proé por i fá avëi cotan de rajuns söl ciamp cultural – politich. Roland Riz é nasciü ai 12 de ma dal 1927 a Balsan, á fat le ginase dai franzescans, é spo roé desco trec d’atri optanc a scora fora Rufach, a Schwaz y a Porsenú. Les raisc dal cognom Riz é da ciafé tla Val de Fascia, da olache so nene vën.
La université á Roland Riz frecuenté a Milan; con 21 agn ál belo arjunt la laurea de iurisprudënza con les mius notes. Do na cörta pratica da avocat a Roma ál motü man dal 1951 a Balsan con so stüde da avocat; con la defonüda dai atentadus (por tod. "Freiheitskämpfer", tal. "dinamitardi") de Südtirol i agn dal 1960 a istituziuns talianes s’ál fat de gran miric y é gnü conesciü lunc y lerch. Con la politica de Roma te Südtirol n’ea chi agn feter degügn encontonc; la gran pert dai posć publics ciafâ taliagn y les abitaziuns ince; tla Provinzia y tla Regiun comanâ i taliagn con söa Democrazia Cristiana, i ladins y i todësc gnea dlunch a trá la cörta.
Roland Riz ea belo dal 1958 gnü lité dala SVP tal Parlamont a Roma y é romagnü por 33 agn önn dai raprejentanc de Südtirol tal Parlamont a combater por i dërc, la autonomia por Südtirol. Al é sté mëmber de Comisciuns parlamentares emportantes, gonot ince so presidënt. Do che la UNO â dal 1960 slomené la Talia y dit tler che ara messâ sciacaré fora con Viena na bona autonomia por Südtirol, á chi da Roma ciafé iames.

Liede deplü t’La Usc di Ladins di 27 de ma  (Lois Trebo)