La Usc di Ladins

Ai 19 de otober l mond de la cultura de dut l Trentin à perdù na persona de gran emportanza. Armando Vadagnini l aea 80 egn, l era nasciù a Moena del 1942 e do se aer laureà en Letres Modernes a l’Università de Pèdua, te sia vita l é stat ensegnant e ence giornalist, l à colaborà con desvalives sfoes e con la RAI de Trent, ma sie enteres maor l é semper stat la storia contemporana. 

L à scrit desvalives libres su l’autonomia del Trentin, su Alcide Degasperi e sul moviment catolich te noscia region, e ensema con Paolo Piccoli studies su la Democrazia Cristiana, su le Acli e su personajes e istituzions che à fat la storia de l’autonomia provinzèla.

Armando Vadagnini l era n inteletual fin, n om zevil e con n muie de enteresc. L vegnia de spes a Moena olache l jia bolintiera coi schi da paslonch e a spas sui troes apede l bosch e l ne à lascià scric no demò de argoment storich ma ence de letradura, vèlch outa per moenat. Sul ultim numer de Nosha Jent l é stat publicà na poejia dal titol »Lègreme per la Vaia senestra«, touta fora dal codejel »Cinquanta liberi sonetti per cinquant’anni insieme« metù ensema del 2019 e dedicà a sia femena Tiziana.

Chest an ai 26 de jugn, en ocajion de la sègra de Sèn Vile, te n domesdì cultural endrezà dal Comun col Grop Ladin de Moena, l é stat prejentà sie ultim liber, deldut desferent da duc i etres: »Quando l’amore è rivelazione«.

De più su La Usc stampèda de vender ai 28 de otober.  (Lucia Gross)