La Usc di Ladins

Col meis de mé de chest an à tacà endodanef a jir fora l rotocalch per ladin Pedies, la trasmiscion con neves da Fascia e da l’autra valèdes ladines. La trasmiscion del Comun General de Fascia é stata renovèda ti contegnui e tel format, l é na produzion de Dolomiti TV de Graziano Bosin per Tv Ladina con i reports e la oujes de Sabrina Riz, Angela Pederiva e Annarita Lollo di Servijes linguistics e culturèi e la referenta giornalista Monica Cigolla.

Col nef digitèl terester l é ruà adalèrch sacotanta neves en cont de co e che veder per televijion.
Da canche no l é più l canal televisif dedicà a la mendranzes del Trentin TML, Pedies é da poder veder sul canal 10 de la televijion, Trentino TV. 

L vegn dat fora de sabeda da les 18:00 e en replica de domenia da les 13:30 ma chi che à na Smart TV i à l met de l veder canche i vel orian su co la friza en su del telecomando i sotcanai HBBTV del canal 10: chiò sot la ousc ‘TML’ se troa ence la puntata de Pedies de la setemèna e prest vegnarà ciareà ence etres prodoc per ladin.

Desche zenza, Pedies l é da poder veder ence sul canal Tv Ladina de Youtube, olache vegn metù a la leta duc i desvalives video e filmac dac fora dal Comun General de Fascia e da l'Union di Ladins.

Chi che à vèlch de curious e de enteressant che ge saessa bel che vegne descoret te Pedies, i pel manèr na e-mail a cultura@cgf.tn.it.