I é do che i fèsc l asfalt sul ultim toch che mencèa da meter a post anter Mazin e Cianacei e dapò vegnarà fat i segnèi via per bas.
I é do a vegnir fenii su i lurieres per meter a post l troi de la rodes anter Mazin e Cianacei. Na storia zenza fin che zacan ades somea ruèr a piz. Do i problemes vegnui fora l an passà d’aisciuda con la firma che no aea portà a compiment la operes e do aer passà n auter istà zenza l troi de la rodes, la speranza era stata per chest uton, ma amò nia, la firma che aessa cognù fèr l intervent é stata spostèda sui cantieres per la Olimpiades. Coscita de mèrz l conseier provinzièl Luca Guglielmi à fat na interogazion te Consei provinzièl per domanèr i tempes per fenir su l ultim toch del troi.
»Aon ciapà te man endodanef i lurieres del troi de la rodes apenamai che l temp ne à permetù de lurèr – ne à dit Giovanni
Maiello responsabol del Ofize infrastrutures ciclopedonali de la Provinzia de Trent. Aon lascià su d’invern e aon endò ciapà ite d’aisciuda ajache chisc lurieres de pavimentazion no pel vegnir fac col freit, aon cognù ge far front a vèlch interferenza de sajon che se troon tedant a chesta sort de lurieres. Aboncont sion do che jon inant, l é da fèr na dejina de chilometres de asfalt e no l é sobito fat. Sion en linea con la scadenza del contrat con la fima che fèsc i lurieres che va fora i prumes de messèl. Nos sion do che spenjon, fajon dut l possibol per ruèr a fenir su dant i lurieres ajache saon che la sajon é jà tachèda ite. Do che sarà asfaltà vegnarà fat duta la segnaletica jabas, ma chest sarà n lurier da poder fèr coran, speron de consegnèr dut l troi per la fin de jugn.«
Podede lejer dut su La Usc stampèda dai 19 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper) (Monica Cigolla)
