La Usc di Ladins

L é stat dalbon n spetacol, l domesdì che en domenia ai 4 de dezember l Comun General de Fascia à endrezà a Ciampestrin, tel PalaDolomites, per zelebrèr l dì internazionèl de la desabilità. N apuntament metù sul calandèr dal ONU ai 3 de dezember, ma spostà al dì do te Fascia per no se sorapeèr con la festa di Studafech.

I Servijes sozio-assistenzièi del CGF – descheche à dit Cipriana Tomaselli, referenta per chesta scomenzadiva – à abù da fèr a chierir de tegnir coi piesc jabas la ‘vulcanica’ conseiera de procura Mirella Florian e l é stat na bela endesfida ge jir do a dut chel che la se à pissà per viventèr chest domesdì tant emportant e segnificatif per ge fèr entener a la comunanza che, descheche à dit l president Mattarella, la persones che à na desabilità l é na ressorsa e l’inclujion l é l banch de proa per la piena afermazion di deric de duc. Coscì l event à volù tor dant l conzet de desabilità da desvalives ponts de veduda per soscedèr la reflescion sun che che vigniun de nos pel fèr, dì per dì, per mudèr sia percezion e trèr ju vèlch stengia che stenton a vareèr.

A averjer con sbunf l domesdì, prejentà a na vida feruscola e sćiantiva de Maura Chiocchetti, l é stat l grop ‘Cianton da marevea’. La oujes e i strumenc di joegn musizisć fascegn à sobito sciudà ite l ambient, e la cianties che se à enterzà ai desvalives momenc à engaissà la jent te sala, che dalbon en gran numer à tout su l envit a tor pèrt.  

La sodesfazion per la gran partezipazion é stata palesèda con legreza da Mirella Florian, che à rengrazià duc i prejenc.
Apontin tel segn de l’inclujion l é stat tout ite n muie de persones e ogneuna à fat sia pèrt, a partir dai trei joegn fascegn Rosanna Verra, Mattia Desilvestro e Vanessa Winterle, che con la desabilità i cogn fèr i conts ogne dì ma che i à desmostrà che de spes chisc limic i é soraldut te nosc cef.

L é stat ic a se pissèr e endrezèr chest projet col didament di Servijes sozièi, e i à cernù desche slogan la paroles »Nesciun limit, demò orizonc« che se podea lejer su la paladina.

Podede lejer dut su La Usc stampèda de vender ai 9 de dezember.




 (Lucia Gross)