La Usc di Ladins

Na ocajon per scutèr musega de gran valuta te noscia valèdes ne vegn dal Dolomiti Ski Jazz, en program dai 3 ai 12 de mèrz te Fascia e Fiem. Chest festival, endrezà da la Aziendes de Promozion Turistica de la doi valèdes con la direzion artistica del baterist Enrico Tommasini da Moena, l é pissà per viventèr l ultim temp de la sajon da d’invern, portan sui portoes conzerc de ogne sort e de aut livel e l é ruà al bel travert de 25 egn.

Ritmes jazz e blues, musega funk e latina encoloresc l bianch de la neif con ben 26 apuntamenc, la maor pèrt sa mont, e etres da sera te teatres o locai de Fascia e Fiem.

Tel program troon inomes cognosciui tel panoram del jazz talian desche Fabrizio Bosso, Stefano Cantini e Francesco Maccianti, e ence n jigant internazionèl del jazz afroamerican desche Bobby Watson. 

Se taca ai 3 de  mèrz col quintet internazionèl »The Hi Stakes« sun Pecol e dapò sarà la vulcanica osc de »Kikka«, l trio de Gipsy Manouche »Accordi Disaccordi« e tropes etres per serèr su en sabeda ai 11 al Palafiemme de Ciavaleis col omaje a Steve Wonder del quartet de Fabrizio Bosso e ai 12 coi Venice Ska-J, ghesć fidei del festival.

L ciantautor de la Val Badia Jean-Daniel Granruaz, en èrt Jeanruaz, en domenia ai 5 de mèrz da les 9 da sera l sarà tel Museo Ladin de Fsascia a Sèn Jan ensema coi doi frèdes musizisć trentins Francesco e Loris Dallago, 
Dut l program é sul sit www.fassa.com o su www.visitfiemme. it 

De più su La Usc stampèda de vender ai 3 de mèrz.


 (lg)