La Usc di Ladins

Duta Fascia en alarm anché da doman, con n gran biteboi de sirenes de mesi de socors, ambulanzes e studafech. L é sozedù n burt azident sun Pian de Schiavaneis, olache entorn mesa les nef da doman n pulmin che jia da Cianacei envers l Jouf de Sela l é jit fora de strèda sutan ju con n sgol de 6 o 7 metres vejin al pent ruan tel ruf Antermont. 

I Carabinieres e i Polins, l 118, la Crousc Checena e la Crousc Biencia, i Studafech de Cianacei, Vich e Poza con la autoscèla, l Socors da Mont Auta Fascia e 6 jolieres é rué sul post.

La persones toutes ite tel azident les é dutes fascènes, l é n grop de 5 gregn e n bez, che fora per duta chesta setemèna l à fat servije per la garejèdes de la Fassa Running. Anché desche i etres dis i jia per l’ultima tapa sun Col Rodela, col pulmin che l Ski Team Fascia ge à emprestà per duta la setemèna del event.

I socoridores à dit che sun strèda no l é segnes particolères che pel didèr a fèr entener la cauja del azident, vegn ipotisà n malor del sciofèr, ma te chisc momenc dut é amò da deschiarir.

Duc i ferii é stac mené demez col jolier. A despet de dut l alarm e l coinvolgiment di socoridores e de la fotografies aricegoles del meso junsom l stravert, l bilanz no l é proprio scì grief, un di ferii l é en rianimazion jun Busan ma no l é en pericol de vita e per duc i etres la situazion la somea manco grieva. 

N gran develpai va a duc i componenc di desvalives gropes de socors, ensema con la speranza che l bilanz no dovente più grief.  (Lucia Gross)