La Usc di Ladins

I se à binà sun Pian di Fiacons en sabeda ai 26 de aost, i dirigenc de Mountain Wilderness Italia ensema coi gropes regionèi de Trenti, Südtirol, Venet e Friul, per rejonèr del davegnir de la Marmolèda e i à metù ju n document che i ge à manà ai Presidenc e Assessores al ambient de la Provinzies e del Comun General, ai Ombolc de Fascia e de La Rocia e amò al President de la Fondazion Dolomites Unesco e al Diretor del MUSE. 

Te chesta letra i met dant proponetes de lurier per n davegnir de calità per la ‘Reina de la Dolomites’, fajan referiment al document che la medema Mountain Wilderness aea metù ju amò del 1998 per portèr dant na proponeta articolèda con na lingia de obietives e de intervenc da fèr adum per l svilup del raion, olache enlouta no se vedea amò l gran pericol per la giacia, ampò l era jà en arbandon. Ampò i aministradores se à cruzià demò de la costion di confins, zenza fèr nia de auter se no vardèr de investir amò sun pilons e ziment, col dèr l sostegn a projec de coleament che no pel esser sostegniboi. Demò del 2017 Cianacei aea proà a lurèr a n projet de recalificazion, ma l era mencià l coinvolgiment de etres atores.

Duc i ponts porté dant jai 25 egn – disc Mountain Wilderness – i pel amò vegnir realisé, e i doventa amò più emportanc se se vèrda a la situazion semper piora di mudamenc climatics.

De più su La Usc stampèda de vender al prum de setember.  (Lucia Gross)