La Usc di Ladins

Avisa n ann dant l gran iubileum di 75 agn de vita y ativité, s’à la FUEN che abraceia passa 100 raprejentanzes de mendranzes etniches, linguistiches y nazionales, abiné adum tla Ungaria, un di raions europeics con na gran richeza de lingac y cultures. A Pécs, per ladin podessen dì "Cinch gliejies", tla Ungaria tl raion dla Transdanubia Bassa (provinzia de Baranya) a pe dles monts Mecsek, él vegnù referì y debatù per trei dis alalongia sun i temesc dl’organisazion politich-culturala dles mendranzes linguistiches dl’Europa. T’Europa vìvel dlongia a truepes mendranzes che à n hinterland cultural ence passa 69 grups de lingaz sciche l Ladin che n’à degun Stat dovia y à sciche gran desfideda la souravivenza de lingaz y cultura. Aldidaencuei, ti temps dla globalisazion y digitalisazion, él saorì da capì che l’assimiliazion linguistica prozed con de gran vari, y che les pitles rujenedes sourantol for plu y plu paroles atuales detedes dai comportamenc di gragn lingac. Ence perchel él gran ora che i lingac raionai vegne adorés te duc i ciamps dla vita da vigni di! Per che chest posse garaté, vàl debujegn che n lingaz sibe codifiché y digitalisé, y che al ae ence na verjion tet (na forma standardiseda) che orienteie dl der vers i idioms y i dialec. Ence l ladin à debujegn de chest lingaz tet, la koiné, per tré adum i fis de n svilup comun di idioms de valeda. L fin dla ressoluzion aproveda dal consei dla FUEN é avisa chel da mené do dant ai Statesc, a les Regions y Provinzies, sciche ence dant a dutes les Istituzions Europeiches la promozion y l sostegn per l’elaborazion y l’adoranza di standarg di pitli lingac.

Liejede inant de plu sun l Congres dla FUEN 2023 tla edizion de La Usc di Ladins che gnirà fora en vender!