La Usc di Ladins

Le Comun de Aunejia ó sconé la cité dla laguna cun n "contribut de azes" dal’aisciöda 2024 inant. Plü iadi dal 2019 incá é chësc daz bele gnü sposté. Al sará n pröm esperimënt, naota de 30 dis, por archité le "over-toursim" che sofoia la cité y sü sorvisc.

Che paiará pa le contribut/daz?
Vigni porsona dai 14 agn insö che jará te cité por n de y n’á nia le dërt de na esenziun.

Che ne paiará pa nia le daz?
I residënc dl Comun de Aunejia, i lauranc (dependënc o profescionisć), i pendolars, i studënc de vigni gre y ordin de scores y universités che á la sënta tla cité vedla o söles mëndres Ijoles, i sogec y i componënc de families che resultëia da avëi paié l’IMU tl Comun de Aunejia.

Che ará pa l’esenziun dal paiamënt?
Düc i ghesć di hotí y dles pensiuns tl Comun de Aunejia che sojornëia almanco na nöt, i residënc dla Regiun dl Venet (che pronotëia indere so azes tal y tal de), i mituns cina 14 agn de eté, chi che á debujëgn de cures, chi che tól pert a gares sportives, forzes dl ordin en sorvisc, l’om y la fomena, le convivënt y la convivënta, la parontela o tlassificada tara cina al 3. gre de residënc ti raiuns olache al vel le Contribut de azes, y na ligna de esenziuns preodüdes dal Regolamënt.