L preve salesian da Vich l à lascià na gran testimonianza de fe, umanità e misericordia per i ultimes e i joegn con dependenzes. En domenia al prum de otober la raprejentazion lo da la Cèsa de Paussa.
Do Pare Frumenzio Ghetta de Martin e Lis dal Vera l é endò n om l personaje cernù dal Istitut Cultural Ladin Majon di Fascegn per l projet »Do l vièl del saer«. Per chesta terza edizion l é stat chierì fora na persona n muie cognosciuda ence sorafora i confins de noscia val: Don Gigi Vian de Poch da Valongia. La responsabola de la Biblioteca spezialistica del Istitut e del projet Alberta Rossi à spiegà la rejon che l é stat cernù chesta persona: »Don Luigi Vian l é nasciù te Fascia olache l à lurà n muie e l se à dat ju per l ben de soa jent, en particolar di più joegn e de chi che aea più de besegn e te val l é vegnù de retorn tel ultim trat de soa vita, rencurà te Ciasa de Paussa. L é da chesta istituzion, che chest
an la festejea i 20 egn de atività, che ge é ruà a la Biblioteca la domana de colaborazion per realisar la edizion 2023 de la scomenzadiva »Do l vièl del saer« ge la dedican a n personaje leà a la strutura a na vida da rechiamar de più l’atenzion di fascegn sun soa realtà. Amò apede la persona de Don Gigi, soa storia e si valores i é atuai e l messaje che i trasmet l à na urgenza soziala che per desgrazia vif ence l mond ladin.«
Chesta storia vegnarà contèda te la raprejentazion de teater »Do l vièl del saer – Don Gigi Vian vel te dir vèlch« che vegnarà portèda dant en domenia al prum de otober te piazal de la Cèsa de Paussa de Sèn Jan te doi apuntamenc, da les 14.00 e da les 16.30. Autora e regista del test l é ence chest’outa Ilaria Chiocchetti del Pelin che metarà en scena la vita del preve da Vich con la compagnia de teater »Trei chèrc de ora«.
De più su La Usc stampèda de vender ai 29 de setember. (Monica Cigolla)
