La Usc di Ladins

Sion endò vertesc a se emprevaler de la ocajon per scutèr musega de gran valuta te noscia valèdes, che ne vegn sporta dal Dolomiti Ski Jazz, en program chest an dai 8 ai 17 de mèrz. Chest festival, endrezà da la Aziendes de Promozion Turistica de Fascia e de Fiem con la direzion artistica del musizist Enrico Tommasini da Moena, viventea da passa 25 egn l ultim temp de la sajon da d’invern, portan sui portoes conzerc de ogne sort e de aut livel. Ritmes jazz e blues, musega funk e latina encoloresc l bianch de la neif con passa 20 apuntamenc, che vegn metui dant dal mesdì sa mont, domesdì fora per i paijes e da sera te teatres o locai de Fascia e Fiem, col sostegn di Comuns, di impianc e di refuges de dut l raion.

Tel program troon inomes de gran nonzech tel panoram del jazz internazionèl, sun duc John Scofield, che portarà dant en quartet sie projet dal titol »Yankee go home« tel teater Navalge de Moena l’ultima sera, en sabeda ai 16 de mèrz, ma ence artisć ladins desche l badiot Alex Trebo che sarà tel Museo de Fascia a Sèn Jan da les 6 da sera ensema col chitarist Manuel Randi en vender ai 15. 
Dut l program é sul sit www.fassa.com o su www.visitfiemme. it

De più su La Usc stampèda de en vender al prum de mèrz.  (Lucia Gross)