La Usc di Ladins

Ai 26 de jugn del 2009 la Dolomites vegnia scrites ite ofizialmenter te la World Heritage list, la lingia di lesc conscidré Patrimonie mondièl de l’umanità. Per coordenèr l lurier de gestion, promozion e stravardament de chisc lesc, didan la colaborazion e la comunicazion anter duc i 9 teritories de la Provinzies de Trent, Busan, Belun, Pordenon e Udin touc ite, l é nasciù la Fondazion. Do i prumes egn sot la vida de Marcella Morandini, la direzion de la Fondazion ge é stata data su acà 3 egn, e da pech renovèda, a Mara Nemela da Cianacei, enjegnera per l ambient e l teritorie. 

Ge aon domanà del lurier de la Fondazion, de la scomenzadives per l cedean e ence de la critiches che l é stat portà dant te chesta ocajion.

"Na roba emportanta che é entenù te chisc egn - ne à dit anter l auter la diretora de la Fondazion - l é che tropes i peissa che l recognosciment mondièl Unesco sie na roba de la Fondazion, enveze l é n patrimonie coletif. La Fondazion fèsc n coordenament che ge vel te n raion tant gran, ma l recognosciment l é del teritorie e duc adum cognon se l sentir mingol più nosc, se l tor più a cher, ge voler ben, se n emprevaler e l mantegnir."

De più su La Usc stampèda de en vender ai 5 de messèl.  (Lucia Gross)