La Usc di Ladins

La Provinzia autonoma de Trent à endrezà enstadì na scontrèda te Fascia per portèr dant sie empegn acioche chest invern vegne denef avert l Zenter traumatologich te val. Chest servije, de emportanza strategica no demò per l turism, ma ence per no meter en crousc l partiment de Prum Aiut te ospedèl fora Ciavaleis, do esser jit inant con bon ejit per egn, do l Covid l era stat tout demez o limità demò al fin de setemèna e dapò lascià su deldut. 

L problem, descheche se sà, l é la dificoltà de troèr l personal sanitèr che serf. Te la scontrèda metuda a jir te la sala grana del Comun General de Fascia a Sèn Jan ai 15 de otober, l assessor provinzièl a la sanità Mario Tonina l é ruà ensema con l diretor generèl Antonio Ferro, l diretor del Distret est Enrico Nava e la diretora de la Unità Operativa Cures Primères del Distret est Stefania Aloisi, e l à dat sia arsegurazion che l empegn che l se aea tout l an passà l vegnarà respetà. 

L Zenter de prum aiut traumatologich arà sia senta a Sèn Jan, ló dal distret sanitèr, e l restarà avert dai 23 de dezember de chest an ai 30 de mèrz del 2025, da les 10 da doman fin les 7 da sera.

Chel che l assessor ge à domanà a la comuanza de Fascia, raprejentèda te chela scontrèda dal procurador Giuseppe Detomas e dai ombolc o enciarié de duc i Comuns fascegn, l é stat l empegn a se dèr ju per meter a la leta i cartieres o la cambres acioche la 4 persones che se darà ju te chest Zenter traumatologich, più avisa infermieres e tecnics de radiologia, posse se loghèr ju te val a condizions sostegniboles.

De più su La Usc stampèda de en vender ai 25 de otober.  (Lucia Gross)