La Usc di Ladins

La noela s’á slarié fora sciöche n tarlí sön düc i media dl monn, y bëgn ince da bocia a bocia danter la jënt. Chësc Lönesc de Pasca, defata do mes dles 8 da doman, s’un é jü da chësc monn Papa Francësch. L'ultima apariziun publica ê stada rodunt inier, en la gran festa de Pasca dl Signur, olache al á ciamó dé la gran benedisciun "Urbi et orbi". Incö danmisdé spo la noela. Bele tles ultimes edemes â Papa Francësch passé tröp tëmp te ospedal, cun incö s’á rové so tru sön chësta tera. Le Pontificat de Papa Francësch â metü man ai 13 de merz dl 2013, do che Papa Benedët XVI s’â ofizialmënter trat zoruch. Bele cun la lîta dl inom Francësch, â l’argentin Jorge Mario Bergoglio – insciö so inom da bato – dé da intëne che al orô alzé fora y mëte al zënter dantadöt la jënt plü püra dl monn, y al â ince tres indô invié la Dlijia da se fá instëssa püra, da se mëte dala pert di püri. Na carateristica de chësc pontificat é zënzater ince stada la orenté de Papa Francësch da reformé la Curia o la Dlijia instëssa, ci che á incunté n gröm de oposiziun. Tla jënt instëssa á chësc Papa da atira descedé simpatia, bele da chës prömes parores pronunziades do süa nominaziun dl 2013, canche al s’â presenté ala jënt sön Plaza San Pire dijon "Fredesc y sorus, bona sëra". Mostran insciö da atira süa vijinanza ala vita y ala jënt.  (pablo)