La Usc di Ladins

Esser genitores aldidanché vel dir ence emparèr a se la fèr ca anter ‘like’, ‘follower’ e notifiches, ajache i social media se tol na lèrga semper maora te la vita di joegn. Emparèr a i cognoscer e i gestir vel dir esser bogn de didèr i fies a desfrutèr sia gran potenzialitèdes, con na consaputa che smendre i pericoi desche la dependenza, l isolament e l cyberbulism.

Per chest l Comun de Sèn Jan, per endrez de l’assessora a la cultura Mirella Florian, à pissà de meter a jir n picol cors de formazion per genitores e educatores dal titol ‘I social media: na endesfida anter risech e oportunità de crescer’.
L percors se dejouc te trei scontrèdes che vegn metudes a jir per trei seres a do a do, en lunesc ai 21 de otober, en mèrtesc ai 22 e en mercol ai 23, semper da mesa les nef da sera te sala del Consei de Comun de Sèn Jan.
Te chest percors la formadora Enrica Ricciardi e la psicologa e psicoterapeuta Francesca Manfredi sporc strumenc per cognoscer la ressorses de la neva tecnologies e troèr strategies educatives per compagnèr i joegn te na doura ascorta di neves strumenc, recognoscer i segnèi de comportamenc a risech a livel mental e emotif e i mudèr te ocajions de confront e dialogh. La partezipazion é debant e averta a dutes e duc, con n envit en particolèr ai genitores.

Se pel lejer dut su La Usc nr 40 dai 17 de otober, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.


 (LG)