La Usc di Ladins

Ai 16.06.2020 se stlüj jö chësc ann de scora cotan atramënter, deache cuntrassegné dal'emergënza dl coronavirus, mo porimpó significatif y istrutif por la storia dla sozieté.
La pandemia ti á saré jö trëi funziuns essenziales ales scores: la struturaziun di tëmps dl imparé, les relaziuns soziales danter scolars y insegnanc y la reflesciun »in itinere« sön i progresc dl aprendimënt. Da n de al ater á les scores dla Talia messü mudé l'insegnamënt, da presënza a destanza: les scores y sü insegnanc á porvé cun gran orenté y fadia, mo ince cun
dötes sües limitaziuns, da se trasformé te scores digitales »e –learning schools« afrontan de vigni sort de desfides te cört tëmp, deache le coronavirus se á slarié fora te döt le monn.
Te de plü paisc dl'Europa y ince te nüsc raiuns, él impröma gnü constaté dificoltés da arjunje düc i scolars y les scolares tres le digital (devices, plataformes, chats, videos, clouds, etc.), é pö chësta na desfida nia ma pedagogica y didatica, mo ince tecnologica, deache ara reverda le sistem digital, dles rëis y dles telecomunicaziuns y döt ci che roda incëria: internet, fira de spidl, etc.. Les condiziuns, te chëres che al é gnü lauré a ciasa n'é nia stades por düc anfat: nia te vigni familia n'êl a desposiziun injins eletronics assá, la rëi funzionâ datrai y datrai nia, val' geniturs podô se tó le tëmp da ti sté do ai scolars, d'atri ê fora de ciasa a lauré ince te chisc tëmps de corona, ciamó d'atri laurâ da ciasa infora y messâ se partí tëmp y injins. Lapró él gnü le malester di scolars, d'ester te n colp catapultá te chësta realté zënza la poscibilité da s'incunté cun compagns y parënc, zënza les ativités a chëres che ai ti jô do normalmënter.
I esperc dla pedagogia evolutiva sá che al ne esist degüna didatica a destanza dërta o falada. Les modalités toma ite tla competënza de vigni consëi de classa. Le scolar romagn intres tl zënter dl'atenziun dles aziuns educatives y didatiches. Te chësc contest emergenzial á i insegnanc fat de gragn sforc por porvé da ti dé inant istruziun y formaziun a sü scolars y a sües scolares, tl limit dles poscibilités. Porchël se miriti n lalt, n giulan y la reconescënza tl respet de süa profesciun dozënta. Sambëgn á ince i scolars y les scolares adöm cun sü geniturs y educadus fat süa pert, colaboran cun interes y spirit de responsabilité, aladó de sües poscibilités. Porchël i vál n rengraziamënt sintí. En chësc ann ési pordërt ince ëi stá esperc y protagonisć, ëi sá le miú co düc, sciöche sü mituns á lauré, tan de buna orenté che ai á mostré y tan de fadia che al ti á costé... Nos sun sigüsc che al n'é nia sté mëisc sciurá demez, al é sté na situaziun te chëra che düc, pici y gragn, á imparé tröp, nia ma contignüs scolastics!
Insigné y imparé a destanza ó dí colaboré y realisé n laur de scuadra danter: insegnanc, scolars, geniturs. Te chësc contest él important da coltivé inant i valurs dla paziënza, dla pésc y dla umilté. Aladó dl scritur Antoine de Saint-Exupéry él tröp plü rî da iudiché se instësc co i atri, y iudiché bun se instësc é n sëgn de sapiënza.
Por l'altonn adorunse düc na normalité nöia, olache i scolars y les scolares podará indó se incunté te scora, te n contest scolastich remodulé en segurëza, cun reflesciuns nöies y idees pro-positives, porchël vál debojëgn
dl aiüt y dla cooperaziun da pert de düc. Adöm ti sunse – »insieme ce la faremo«, ne dess nia ma ester le slogan tl'emergënza, mo bëgn le slogan dla solidarieté por nosc dagní.  (Le Consëi de Istitut – Direziun Raionala Badia)