La Usc di Ladins

Chi de nëus ne cunësc pa nia chëla blòta luegia sal Lech da Bleje sun streda de Ncisles, ulache scumëncia l troi de Juac y pona inant via y su, danter ch’i biei zirmesc ntorc, su per ch’i purons? Na luegia che ova zeche de ncant y che te dajova ite na gheneda y na pesc... Ruvan su iló, sibe d’inviern che d’instà, te se giauriva l cuer y n jiva inant danter ch’i biei zirmes su cun var lesier. Zirmes che arà abù aniscimi a crëscer iló sun ch’la pieres, se tenian cun si ravises dut ntëur ite y uni iede che n passova fòvel na marueia a ti cialé. De chëi ne n fòvel nia mé un iló sëura l pitl lech su, ma de plu, un plu bel che l auter, y l blòt aghel che se n rausciova danterora.
L me à fat mel al cuer a udëi duc ch’i biei lëns taiei y me n son pieda juvier me damandan: ma co pòssen pa, co pòssen pa lascé pro vel’ da de tel te na luegia tan bela y particulera? Ulëssan nvië duc a jì su śën a ti cialé a chël giuel de luegia.

Elisabeth y Mirjam Senoner, Santa Cristina