La Usc di Ladins

Te La Usc dl 19 de agost onse publiché n articul entitulé »Politica ladina: Cie nen pensa pa i candidac ladins?«, olache i ti on fat n valgunes domandes sun tematiches spezificamenter ladines, sciche l’unité ladina, l referendum de Souramont dl 2007, l’adoranza dla bandiera ladina, l lingaz scrit unfiché y la Lia di comuns ladins. La speranza fova che i candidac ti lascisassa alsavei ai litadours cie che ai pensa y se tol dant de fé sce ai vegnirà lités ti conseis provinzai de Bulsan y Trent.

Fin a encuei ne él ruvé adalerch deguna resposta. Dai raprejentanc ladins atuai a Bulsan sonse usés a vegnì ignorés ma dai candidac nuefs sun d’autres listes se essanse aspeté na reazion desferenta, plu positiva. Ciuldì pa chest scuté chiec: degun enteres o mancianza de respet per i litadours? L comportament di candidac é rie da capì sce an conscidra che i temesc tratés tles domandes fova bele contegnus tl « Memoradum ladin » porté dant tl cheder dla Convenzion per la reforma dl statut de autonomia dl 2016 che é vegnù sotescrit da plu de 200 persones; la gran pert di firmatars dl Memorandum sarà ence litadours ai 22 de otober. La reunificazion ladina é perauter na revendicazion fondamentala che à complì chest ann 100 agn y che vegnuda porteda dant con forza da La Union di Ladins ai 14 de messel a Cortina d’Ampez. L’autra ghiranza, chela de n lingaz scrit unificé o standard, atualmenter bloché da Bulsan, à giapé dant n valgunes edemes l sostegn a l’unanimité da pert dla FUEN.

L’unité ladina ne é dessegur nia l unich tema che enteresseia i litadours ladins; l’economia, l fabriché, l turism, l marcé dl laour, la sconanza dla contreda, l’assistenza sanitara y soziala, i problems liés a la migrazion y tanc d’autri arà per truepa jent na maioura importanza che la sconanza dla cultura y dl’identité ladina. Perempò ratonse che i litadours ae l dert de giapé dai candidac na resposta ence sun chesta chestion per dezide a chi ti dé la ousc. Ciuldì ti dess pa n litadour ladin ti dé la creta a n candidat che ne à nia da dì y nia da propone per i bujegns culturai y per l souravive entes de sia comunité sciche grup linguistich autonoma?

Les lites provinziales é dant porta y i candidac à ciamò l temp da informé la jent sun cie che ai conta da fé, ti media o, ciamò miec, ti programs eletorai de sies listes.

Erwin Valentin, Lois Trebo, Badia