La Usc di Ladins

Ultimamënter iel unì scrì y rujenà truep de »Rodaval« y perchël sons jit a ti cialé ai posć tl Chemun de Urtijëi, Sureghes y Runcadic. 
Scumencian dal puent de Palmer nchin japé dla furnadoia de Mont Sëuc y a man ciancia ora daujin al Derjon, iló ne pòssen nia dì che l se trata de n tòch de Rodaval: doi hotiei, restauranc, bars, l Mar Dolomit, la furnadoia Mont Sëuc y mo l scumenciamënt dla streda Vidalonch iel iló da udëi. Rodes nen iel pueces da udëi. Japé dla furnadoia nchin sa la Gran Cësa iel unì fat dan ades doi ani n bel tòch de streda per la rodes. Dala Gran Cësa vàla depona mpue suvier. Na streda per duc, nchin pra la streda Purger, ulache n muessa dan la passé via furné a man drëta n valgun metri sun l tretuar per pona raidé, do inò n valgun metri, a man ciancia y passé via la streda Purger y n fregul plu insù nce la streda Rumanon (periculëus), per pona ruvé sun la streda sëura la streda Purger nchin sal Scioler, ulache furnea ënghe dl dut y a pe vëniel iló jit dassënn (sculeies). Do l Scioler iel plu pusciblteies. La prima ie furné a man drëta sun la streda che ruva tl raion artejanel de Urtijëi. Iló iel truep lauranc, reprejentanc de firmes y n.i. y perchël ne n’iel nia da pensé a na streda per la rodes. Dal’autra pert dl Derjon furnéen tl raion artejanel dl Chemun de Ciastel. N blòt troi per jì a pe iel ënghe mo, ma per la rodes dut nia adatà. A Runcadic iel unì fat n sotpassaje bele dan n valgun ani, speron che n possa l adurvé te vel’ maniera.

Pra l puent ora Puntives iel permò da udëi sce l fova drët o nia spënder tan de scioldi – per tan de rodes pa?

Cun de biei saluc,

Giuseppe Stuflesser, Urtijëi