La Usc di Ladins

Copa Provinziela de slalom strënt te Val
La garejedes che vel per la Copa Provinziela sarà ai 8 de jené dala 09:30 inant te Val
L Schi Club Gherdëina mët a ji na garejeda de slalom strënt che vel per la Copa Provinziela per la categuria di mutons y dla mutans danter i 12 y i 14 ani. La garejeda sarà te Val, sun l purtoi Cir, n dumënia ai 8 de jené. L unirà pià via dala 9.30 cun la prima manche y riesc do cun la segonda. La premiazion sarà ntëur la 14:00, japé dl purtoi te Val dan la utia Ciampac. Duta la apasciunedes y i apasciunei de schi ie nviei a unì a ti cialé a chisc pitli campions y campiunësses dl daunì.

Na cité sön mosöra por porsones y ambiënt
Trëi referac cörc y na discusciun sön les poscibilités de na planificaziun urbanistica sostenibla, dlungia la porsona y l’ambiënt
Le Consëi de Formaziun Badia, en colaboraziun cun le Comun de Badia, mët a jí na serada en vëndres ai 13 de jená dales 17:00, tla Ciasa dla cultura a La Ila. Trëi é i referënc: Virna Bussadori – direturia dl Ofize provinzial Natöra, Contrada y Svilup dl Teritore; Helmuth Moro­der – injenier y espert de mobi­lité; Philipp Rier – urban planner y designer. Ëi cuntará sciöche na planificaziun urbanistica sostenibla ciara fora, sciöche na mobilité alternativa y plü dlungia l’ambiënt pó funzioné, ciüna che é la dërta direziun por le svilup de nüsc paisc y nosc ambiënt, che nes dëida sparagné terac y ressurses, zënza jí a smendrí nosc bëgnester.