La Usc di Ladins

Daurida cun »Les usc dla ligrëza«
En lönesc ai 10 de messé dales 21:15 mët man te dlijia de Badia le Festival Badiamusica 2023, cun musiga vocala taliana y musiga da orghe todëscia
La premiera dl Festival Badiamusica vëgn a s’al dé cun le trio »Voces Iucunditatis« (Les usc dla ligrëza), metü adöm da Lia Sera­fini (sopran), Giulia Gabrielli (mezzosopran) y Franz Comploi al orghe. Sot al motto »musiga vocala taliana incunta musiga da orghe dla Germania dl nord« gnarál porté dant musiga antica, danter l’ater de Dietrich Buxtehude, Alessandro Grandi, Johann Sebastian Bach y Claudio Monteverdi.
»Il Decamerone. Vita e morte«
Le Festival Badiamusica pîta ai 13 de messé a Corvara n teater musical aladô dl Decamerone de Boccaccio. Protagonisć é »Philipp Lamprecht & Friends«
La serada dla jöbia ai 13 de messé dales 21:15 tl salf dles manifestaziuns a Corvara é na novité tl cërtl dl Festival Badiamusica. Al gnará porté dant le teater musical »Il Deca­merone. Vita e morte«, aladô de Giovanni Boccaccio, por dui aturs y trëi musizisć. La realisaziun y direziun musicala é de Philipp Lamprecht, che á ince metü jö i tesć deboriada cun Isa Weiß y André Hinderlich. Weiß y Hinderlich á ince la regia y fej da aturs y ciantarins. Ai gnará acompagná cun musiga sön stromënc d’epoca, portada dant da Susanne Ansorg (usc y stromënc medievai a archët y da zupfené), Ian Anderson (usc, erpa gotica, pia, whistle, zinch y tamburin), Philipp Lam­precht (usc, stromënc a percusciun storics, pauca, viola da roda, ciampanes storiches).


Musiga da mort – seriosa y ince nia
Festival Badiamusica: en sabeda ai 15 de messé dales 21:15 él te salf dles manifestaziuns da La Val le conzert »Schöner Sterben – Morir cantando«, cun na serada dedicada ala musiga da mort
Te tëmps malsigüsc baion tröp dla mort, ince sce nia ion. La mort y la musiga comunichëia indere ion. I cater compagns che se incunta pro n gote de vin te chësta bela sëra malin­conica, fej n iade musical tres secui de musiga da mort, da Monteverdi, Bach, Mozart, toc islandesc y melodies colom­bianes cina ala musiga da mort de Charles Ives por so cian, ales cianties vienejes, a Mani Matter, a Billie Eilish y a d’atri toc pop. Al é musiga da mort sceria y ince nia, che vëgn aranjada y presentada acusticamënter y eletronicamënter sön de plü stromënc. Protagonisć sön paladina é »Miribung & Friends« cun Eva Miribung (vidora, usc), Mara Miribung (cello, mandolina, usc), Daniele Pintaudi (rezitaziun, clavier y usc) y Mathias Weibel (viola, mandolina, synthesizer, clavier y usc).


London Brass
I Jëuni de Mujiga de Gherdëina mët a jì n cunzert da d’instà cun la grupa London Brass: ai 12 de lugio dala nuef da sëira sun Plaza de Chemun te Sëlva
La grupa London Brass ie metuda adum da musizisć cunesciui cun esperienzes tl ciamp dla mujiga tlassica, dl jazz y dl pop. La ie nasciuda tl 1986 cun l’idea de fé mujita tlassica cun strumënc de banda, coche la tumbrëta, l corn y la tuba. Plu tert àn pona nce mo tëut ite musizisć che sona la posauna y n à nsci scumencià a purté dant pec de mujiga jazz y mujiga plu moderna. I artisć à bele sunà tl Lincoln Centre a New York, tla Suntory Hall a Tokyo y te si ncësa tla Albert Hall BBC Proms a London.
L cunzert sun Plaza de Chemun te Sëlva, n mierculdi ai 12 de lugio dala 21:00, vën metù a jì n cunlaurazion cun la Fundazion dla Cassa dl Sparani y ne fej nia pert dla sajon di cunzerc di Jëuni de Mujiga. Perchël ne vel l abunamënt te chësc cajo nia. La chertes costa 15€. Jëuni y jëunes nchin a 26 ani paia mé 10€.


»Gosté da paur«
Insciö á inom öna dles novités gastronomiches de chësc isté tl’Alta Badia. Cinch apuntamënc, sön cinch lüsc desvalis
Le gosté é le past plü important dl de y en ocajiun di cin’ apuntamënc fora por i mëisc de messé, agost y setëmber gnarál pité vigni iade sön n ater lüch da paur n gosté cun produc locai. Do na cörta spazierada, podará i partezipanc vijité le lüch adöm cun le paur y süa familia, y te val’ caje ince odëi o tó pert ala produziun dl ciote, jí te stala a tó i üs y i.i.. Chësc denanche se gode n bun gosté cun lat, smalz, üs, pan y d’atres spezialités fates te ciasa. Le pröm apuntamënt é ai 11 de messé sön le lüch Larcenëi a Badia dales 7:45, cun na cörta spazirada che pëia ia da Oies. I atri apuntamënc é ai 25 de messé pro le lüch Ruances a San Ciascian, ai 8 d’agost pro la »Dolomites Farm« a Calfosch, ai 22 d’agost pro le lüch da Mirió a La Val y ai 12 de setëmber pro le lüch d’Arslada a Badia. Les prenotaziuns al prisc de 30,00€ por i adulc é da fá ti ofizi turistics dl’Alta Badia o sön la plata internet www.altabadia.org


Sonns tla natöra
Chësc isté gnarál metü a jí dui apuntamënc de meditaziun y relassamënt, acompagná dal sonn dl gong, tla bela culissa dla natöra sö La Crusc a Badia. Pröm iade ai 10 de messé
Ara se trata de na sesciun de massaje dl sonn tres le stromënt dl gong, dles ciampanes tibetanes y de d’atri stromënc, che porta i partezipanc te na fasa de meditaziun y relassamënt. Na bona ocajiun por se tó tëmp por se instësc y passé n danmisdé alaleria amesa la natöra. Le pröm apuntamënt é söl program en lönesc ai 10 de messé sura la staziun a munt dl lift »La Crusc1«. L’incuntada mët man dales 11:00 y döra apresciapüch n’ora. »Sonns tla natöra« gnará ciamó metü a jí n iade, le lönesc ai 7 d’agost. Les prenotaziuns al cost de 10,00€ mëss gní fates ti ofizi turistics dl’Alta Badia anter le de denant, o sön la plata internet www.altabadia.org


Na munt de emoziuns
Tratan l’isté él tl’Alta Badia cater serades, olache alpinisć de livel internazional cuntará de sües esperiënzes tles munts. Daurida ai 11 de messé cun Tamara Lunger
Ince chësc isté vëgnel pité tl’Alta Badia »Na munt de emoziuns«, la linia de referac cun alpinisć y personaji liá ales munts.
11.07. Tamara Lunger
Le pröm apuntamënt é en mertesc ai 11 de messé a La Ila, cun l’alpinista Tamara Lunger. Te so referat »Io, fragile e forte come il ghiaccio«, cuntera de süa spediziun söl Gasherbrum tl’invern 2019/20 y chëra sön le K2, olache ara á pordü 5 compagns.
24.07. Martina Valmassoi
Ai 24 de messé i tochera spo a Martina Valmassoi, atleta da salté y de schialpinism, mo ince apascionada de fotografia. A Corvara ti cuntarára al publich de sües aventöres tla munt.
25.08. Matteo della Bordella
Matteo della Bordella é spo le protagonist dl’incuntada di 25 d’agost a La Ila. Al presen­tará sües spediziuns tla Patagonia, Groen­landia, Pakistan, India y l’isola de Baffin.
05.09. Aaron Durogati
La seria de referac vá a piz ai 5 de setëmber a Corvara cun Aaron Durogati – campiun de parapënd che á davagné dui iadi la copa dl monn y é deventé n atlet dla Red Bull X-Alps. Al nes cuntará dles emoziuns che al proa tratan sü jori, sciöche ince de sües espe­riënzes tl aier.
Les prömes trëi incuntades é dötes dales 21:15, tl salf dles manifestaziuns di paisc dl’Alta Badia y por talian. L’ultima é dales 20:30 y por todësch.


Curs de dessëgn de basa
L’EPL–Ert por i Ladins mët da jí por la »Cademia La Pli« tla Scora d’La Pli de Mareo n curs de dessëgn de basa cun Jutta Valentini, por jones y jogn dai 12 agn insö y adulc
Le curs gnará tigní dai 24.07. ai 28.07.2023 dales 9:00 ales 13:00. Les partezipantes y i partezipanc á da tó para deplü massaries de laur y material: raisplais 2H, HB, 2B, taiarin, papier, guma spizada. Le cost a porsona é de 150,00 €. Informaziuns y iscriziuns pro l’artista Jutta Valentini: jutta@valentini.cc


Curs de pitöra a öre alaleria
L’EPL–Ert por i Ladins mët da jí por la »Cademia La Pli« a La Pli de Mareo n curs de pitöra a öre alaleria cun Jutta Valentini, por jones y jogn dai 12 agn insö y adulc
Le curs gnará tigní dai 31.07. ai 04.08.2023 dales 9:00 ales 13:00. Le cost a porsona por le curs é de 150,00 €, lapró se ajunta le cost dl material de 30,00 €.
Informa­ziuns y iscriziuns pro l’artista Jutta Valentini: jutta@valentini.cc


Curs de kintsugi
L’EPL–Ert por i Ladins mët da jí por la »Cademia La Pli« a La Pli de Mareo n curs de kintsugi cun Gaia Lionello, por jones y jogn dai 12 agn insö y adulc
Le curs gnará tigní ai 29 de messé 2023 dales 15:00 ales 18:00. L’ert dl kintsugi é na tecnica iaponeja dër vedla, cun chëra che an cuncia n toch de ceramica (arjila/cop), valorisan les sfesses cun stöp d’or. La tecnica nasc tl secul 1400, sot al shogunat de Ashigaka Yoshima, te na epoca de cultura dër nobla, influenzada dal’estetica sabi y dala filosofia zen. La tecnica tradizionala adora le lach Urushi y stöp d’or; tl ozidënt vëgnel adoré n larié che costa demanco y é plü saurí da ciafé. Le cost por tó pert al curs é de indöt 80 € (al tól ite la leziun y le material che vëgn metü a despo­siziun). Informaziuns pro l’artista Gaia Lionello: gaialionello@hotmail.com – tel. 333 3653636


»Kulturmeile« Gudon 2023
La cuinta edizion de »Kulturmeile« Gufidaun gëura si portes ai 16 de lugio dala 10:00 nchin la 19:00
La mostra passerà dala dlieja de San Martin cun la bela capela de Santa Berbura, l museum dl luech y tres luesc chiec, idilics y sugestifs.
Nia mé l artist cunesciù Josef Telfner meterà ora te chësta bela luegia, ma nce 30 d’autri artisć y artostes, danter chisc nce trueps de Gherdëina (Damian Holz­knecht, Wilhelm Senoner, Armin Grunt, Christian Holz­knecht, Otto Piazza, Roland Peratho­ner, Roland Moroder, Hans Rabanser, Ivo Piazza, Sigmund Holzknecht)
Duc i amanc y la amantes de ert y cultura ie nviei:des a unì a se lascé ispiré tres l troi che passa dan la opres via, cun i sonns dla grupa de mujiga Titlá. Nce da maië y n bon got de vin saràl da giapé.
Chëst ann uniràl nce metù a jì n cuncors per la realisazion de n’opra che giaperà si lerch pra na stazion dl troi storich »Gufiweg«. L’opra che vencerà unirà liteda da na giuria y nce l publich puderà dé ju si stima.


Curs da portreté
L’EPL–Ert por i Ladins mët da jí por la »Cademia La Pli« tla Scora d’La Pli de Mareo n curs da fá portrés cun Jutta Valentini, por jones y jogn dai 12 agn insö y adulc
Le curs gnará tigní dai 24.07. ai 28.07.2023 dales 15:00 ales 18:00. Les par­tezi­pantes y i partezipanc á da tó para deplü massaries de laur y material: raisplais 2H, HB, 2B, taiarin, papier, guma spizada.
Le cost a porsona é de 150,00 €. Infor­maziuns y iscriziuns pro l’artista Jutta Valentini: jutta@valentini.cc


Curs de xilografia
L’EPL–Ert por i Ladins mët da jí por la »Cademia La Pli« a La Pli de Mareo n curs da fá inzijiuns a relief sön plates de linoleum cun Gaia Lionello, por jones y jogn dai 12 agn insö y adulc
Le curs gnará tigní ai 5.08. y 6.08.2023 dales 15:00 ales 18:00. La xilografia é na tecnica de stampa a relief dër vedla, che gnô bele adorada tl Egit dl V-VI secul dan C. Al vëgn intaié le dessëgn sön na brëia de lëgn o linoleum, che vëgn spo depënta cun corú y stampada sön papier.
Le cost a porsona é de 110,00€ (60,00 € les leziuns, 40,00 € le material che vëgn metü a despo­siziun). Informaziuns y iscriziuns pro l’artista y maestra Gaia Lionello: gaialionello@hotmail.com – tel. 333 3653636


Jöbia de Corvara
La »Jöbia de Corvara« sará dedicada ince chësc isté al’ert ladina, cun artisć y musizisć dl post. Dui apuntamënc: ai 13 de messé y ai 24 d’agost
En ocajiun di dui apuntamënc cun la »Jöbia de Corvara«, él de plü artisć dl post che pre­sentëia sües operes d’ert y musizisć dl post che sona o cianta. N domisdé rich d’ert, te chël che an pó se gode n bun aperitif ti locai dl zënter de Corvara – stlüt al trafich dales 17:00 ales 22:30. Pro le pröm apuntamënt cun la Jöbia de Corvara ai 13 de messé podarán ascuté sö le grup »Gota Music«; al sará ince Oswald De Giovanni che mostra sciöche an fej da ti dé cun la scoriada y an podará aprijé i platleri jogn da Tramin. Guido Tavella mostrará indere l’ert dl depënje y Mariangel Pedratscher co che an fej da ziplé le lëgn. I plü pici pó se devertí pro le stont di jüc y ince se lascé depënje sö le müs, cina ales 19:00. La manifestaziun vëgn tignida dales 17:00 ales 20:00 y sce al ess da ester bur’ tëmp, vëgnera spostada ai 20 de messé. Le secundo apuntamënt é indere ai 24 d’agost – sce al é bur’ tëmp al 31.


Conta l uele – vernissage de Barbara Runggaldier
L Circolo–Lia Mostra d’Ert nvieia ala giaurida dla mostra de Barbara Runggaldier, che sarà ncuei vënderdi ai 07.07. dala 18:00 n gaujion dla mostra culetiva »Conta l uele«
Barbara Runggaldier ie chersciuda su te Sëlva y à studià storia dl’ert a Viena. Al didancuei lëurela per urganisazions nternaziuneles tla produzion de ntraunides artistiches y de mostres.
I lëures prejentei mostra pensieres y sëmies, che se muda te si sëni y forma coche lecorc tl passé dl tëmp.
La mostra »Conta l uele« porta adum lëures inuvatifs che abina sinergies danter tecniches desferëntes dla pitura dl uele sun tëila. Ntan la trëi enes de lugio unirà la sala dla mostres cureda da un:a artist:a al iede, for per n’ena: dai 7 de lugio nchin ai 13 de lugio saràl metù ora i lëures dla prima mostra persunela de Barbara Runggaldier. Orares de giaurida: uni di 16.00 – 19.00, sada y dumënia: 10:00 – 12:00.


Teater alalergia a Urtijëi
La Lia dl Teater de Urtijëi nvieia a si spetacul alalergia dal titul »Der wunderbare Massenselbstmord« tla chëurt dla scola elementera. La première sarà ai 14 de lugio dala 21:00
Tla chëurt dla scola ele­mentera de Urtijëi uniràl purtà dant n teater alalergia. La Lia dl Teater de Urtijëi à cris ora n pez de atualità, da n titul che sciautrësc mpue, ma che ie ala fin n inn ala vita. »Der wunderbare Massen­selbstmord«  ie na satira plëina de umor fosch dl finlandesc Arto Paasi­linna. L ie na storia de jënt che ulëssa se tò la vita, ma che recunësc riesc che la vita ie mpo bela.
La storia vën reprejenteda sot ala regia de Gerd Weigel. La Lia dl Teater de Urtijëi lëura cun si cumëmbri:es, che dà ca truepa ëura per purté dant na storia nteressanta, plëina de situazions stravagantes. Na storia che possa ti plajëi a duc y dutes che cëla pro.
La première tla chëurt dla scola elementera a Urtijëi ie n vënderdi ai 14 de lugio dala nuef da sëira. D’autra re­pre­je­ntazions ie ududes dant ai 18, ai 19, ai 21, ai 22, ai 25, ai 27 y ai 29 de lugio, for da sëira.


Arjigná por le Gadersound 2023
Al ne mancia nia plü dî che le festival Gadersound gnará daurí al publich. Le bosch é romené sö, la decoraziun tacada sö y le team Gadersound ciarié de energia por dé le bëgngnü
Gadersound mët man en vëndres ai 14.07 dales 20:00 cun la band de Südtirol »Beyond Hills«, la sëra vá spo inant cun 2 d’atri grups cone­sciüs sura i confins fora. Le de do da misdé pó pici y gragn se devertí cun jüc y ativités desvalies.
Dales 15:30 él Nadia Rungger y Nadia Moling cun so podcast »Ladin Pop - usc jones rejona«, Ares baia cun jones ladines y jogn ladins de musiga da punc d’odöda desfarënc, abiná ala domanda dl’identité y dl lingaz ladin. Da sëra podarán spo se devertí dan paladina cun Alexander Dal Plan y d’atres bands. L’entrada al festival é da misdé debann por düc y da sëra debann por düc sura i 50 agn.