La Usc di Ladins

Terapia dl’eves
La Lia dal’eves Gherdëina nvieia a n referat sun la terapia dl’eves (apiterapia) n vënderdi ai 15 de setëmber dala 20:00 tl self dla mostres te Cësa de Cultura de Urtijëi. N sada ai 16 de setëmber dala 09:00 uniràl rujenà y dat cunsëies sun co fé ju y adurvé la sustanzes dl’eves
Doi ani ie passei da canche on pudù festejé i 100 ani de nosta lia. N chëla ucajion ans ulù mëter a jì danter l auter n bel referat sun l tema dl’apiterapia, che ie purtruep tumà tl’ ega per gauja dl Covid. Śën, doi ani do, iesen inò stac boni de mëter a jì chisc referac cun l medemo reladëur, l espert drët cunesciù Anton Reitinger – presidënt dla »Österreichische Gesellschaft für Apitherapie«. L’apiterapia vën for plu y plu adurveda y cunsieda per mei d’uni sort, per se curé te na maniera naturela. La miel ie dessegur la plu cunesciuda, ma l’eves nes dà nce truepa d’autra sustanzes scialdi sanes y de utl, danter chëstes l propolis coche antibiotich naturel, la »pappa reale«, l stuep dla flëures che possa judé contra la alergies, la cëira, l tuesse dl’eva contra l rematisc, monce l’aria che ie ti castli dal’eves, che vën trata ite da chi che à problems a tré l fla, y mo truepa d’autra sustanzes. De duc chisc prudoc uniràl rujenà n la sëira dl 15 de setëmber. L di do, sada danmesdì, saràl pona l mesun de mparé co fé ju y adurvé chësta sustanzes tan sanes. Per chësc workshop, for tenì dal espert Reitinger, saràl de bujën de se nuté su: 348/0638945. Duc ie sambën nviei a unì a scuté su n vënderdi ai 16 de setëmber dala 20:00 y nce l di do dala 09:00 danmesdì.

Iscriziuns ai cursc de Badiasport
L’assoziaziun Badiasport pita chësc altonn cursc desvalis de nodé y atletica: por prinzipianc, por alenamënc, por adulc
Prinzipianc – nodé y atletica: curs da nodé y atletica por prin­zipianc (cun Cristina y Davide), nodé vigni lönesc domisdé tla nodadoia da La Ila y atletica vigni mertesc, da otober cina ma. Le cost é de 200,00€.
Alenamënc – nodé y atletica: cun otober mët a jí Badiasport alenamënc da nodé y atletica (cun Verena y Davide). Al vëgn insigné i stii lëde, spiné, arosch y delfin. Le training de altetica lisiera alza fora les capazités de coordinaziun y de condiziun, al vëgn ince insigné les formes de basa dles singoles disciplines de atletica lisiera. Nodé vëgn tigní vigni jöbia tla nodadoia da La Ila, l’atletica lisiera vigni mertesc da otober cina ma. Le cost é de 200,00€.
Adulc - nodé adüm: Cun otober mët indô man »Nodé adüm – nodé por adulc« cun Verena. Al vëgn insigné i 4 stii lëde, spiné, arosch y delfin, y mioré la coordinaziun y la condiziun. Le curs vëgn tigní tla nodadoia da La Ila vigni mertesc, da otober cina ma. Al n’é nia n curs por prinzipianc, porchël vëgnel damané les capazités de basa dl nodé.
L’iscriziun ai cursc mëss gní fata cun le formular, sön www.badiasport.org/novite . D’atres iscriziuns por e–mail o telefon ne gnará nia tutes en conscidraziun.

»Fitnesslandia« – altonn 2023
La Uniun Sport La Ila mët a jí chësc altonn n program de cursc cun ativités desvalies te palestra y nodadoia, por pici y gragn
Ginastica t’ega, nodé, balé, yoga, ginastica pre – schi, ativités motories y ginastica funzionala. Döt chësc fej pert dl program »Fitness­landia«, che la US La Ila mët a jí chësc altonn.
I cursc é ponsá por pici y gragn, cun ativités che vëgn desfirades te palestra y ince te nodadoia. Les iscriziuns pón fá ma online sön la plata www.uslaila.it sot ala usc »Iscriziun«. Sön la plata ciafon ince informa­ziuns plü menüdes sön i cursc. Por infos y assistënza por les iscriziuns pón scrí a fitness@uslaila.it

Mëssa en onur de siur Heinrich Videsott
Ai 17 de setëmber vëgnel tigní a La Val na santa mëssa de rengraziamënt y suplica al Sorvidú de Dî siur Heinrich Videsott
En domënia ai 17 de setëmber dales 14:30 inviëia le Comité di Amisc de Siur Heinrich a na santa mëssa solëna de rengraziamënt y suplica por recordé le Sorvidú de Dî siur Heinrich Videsott. La mëssa gnará zelebrada da pater Paul Raj Thaveethu MSFS, cun l’acompagnamënt musical dl cor di ëi da Toblach–Sanciana, dl grup de stromënc a fle »Blechzinnen Toblach« cun l’organist Robert Cavosi y sot ala direziun de Karl Oblaser.