La Usc di Ladins

»Ujöp da Oies« a Bulsan
En gaujion di 20 agn da la santificazion de Sant Ujöp Freinademetz, vegnel reprejenté l teater musical »Ujöp da Oies« a Bulsan
Do l gran suzes dl teater musical »Ujöp da Oies« l ann passé a Oies, garetel sen na reprejentazion foradecà. Tres la colaborazion y con l’aiut dla Co­munanza y dla Consulta Ladina a Bulsan, vegnirà l teater musical porté sun paladina a Bulsan, plu avisa en sabeda ai 23 de setember da les 20:00 tl Waltherhaus.
L toch vegnirà porté dant per ladin, con sottitui per talian y per todësch. Sun paladina saràl da audì la Müjiga de Badia, deberieda con 55 jobleres y jobleri anter 7 y 70 agn, dla Val Badia. Les chertes pòn compré dantfora sun l sit internet www.musi caloies.it Mutons y mutans sot i 14 agn paia 10,00€, i adulc 20,00€. Per informazions: tel 0471 997097.

Roba da fé damat per na fin de bën
La grupa Gherdëina per l Perù chier adum roba da fé damat de segonda man da vënder sun l marcià de Segra Sacun. Cun la dunfiertes ti vëniel judà ai:ala puere mutons:ans tl Perù
Ëis’a roba da fé damat da dé ca? Ulëis’a cumpré juesc de segonda man ti judan al Perù?
Bele da n valgun ani incà à la grupa Gherdëina per l Perù n stond de roba da fé damat de segonda man sun l marcià de Segra Sacun.
Chi che ëssa vel’ roba bën mantenida (juesc, lego, libri...) da dé ca possa la dé ju da Andrea Walpoth tla str. Purger 61 nchin ai 8 de utober.
I scioldi dla dunfiertes ti vën dac ai mutons y ala mutans dl Perù, ulache l ie nce l ulenter de Urtijëi Matteo Prinoth che juda.
Nfurmazions: Andreas Walpoth 347 405 7104. De gra de cuer!

Criatività ie devertimënt
L KVW Urtijëi mët a jì trëi ancuntedes de hobby, criatività y devertimënt, te Calonia de Urtijëi basite, cun la terapeuta d’ert Claudia Verra. L apuntamënt ie ai 4, ai 11 y ai 18 de utober, for dala 19:30 nchin la 21:30
Es’a ueia de fé velch cun la mans? Cun forba, mauta y materiai desfrënc posses te devertì te na maniera liedia, recunëscer ti bona ideies, ti capaziteies y te n sté bën.
N possa se scrì ite bele da śën inant cherdan su l numer 3384848676. L vën tëut su al plu 10 persones. L priesc ie de 30 euro y 10 euro per l material.

Infopoint informatica: i ciafun na soluziun ai problems tecnics
Le Consëi de Formaziun Badia organisëia incuntades te biblioteca a La Ila y a Badia, olache an pó fá domandes desvalies che á da nen fá cun computer y smartphone
Chëstes incuntades é ponsades por daidé dötes y düc chi che á domandes che reverda l’adoranza de computer y smartphone: co scrí na e-mail? Co fá n pü’ de lerch sön le smartphone? Co istalé n program antivirus sön le computer? Chëstes y tröpes d’atres domandes podará gní portades dant.
Le travert é chël da ciafé na soluziun individuala a vigni sort de chestiuns tecniches. Dötes y düc chi che adora n sostëgn cun computer y smartphone é dër bel inviá.
Les incuntades vëgn pitades ai 21 y ai 26 de setëm­ber dales 15:00 ales 16:30 te biblioteca da La Ila y ai 4 y 11 de otober dales 15:00 ales 16:30 te biblio­teca de Badia. Referënta é Maddalena Valen­tini. Organisaziun: Consëi de Formaziun de Badia

»Fitnesslandia« – altonn 2023
La Uniun Sport La Ila mët a jí chësc altonn n program de cursc cun ativités desvalies te palestra y nodadoia, por pici y gragn
Ginastica t’ega, nodé, balé, yoga, ginastica pre – schi, ativités motories y ginastica funzionala. Döt chësc fej pert dl program »Fitnesslandia«, che la US La Ila mët a jí chësc altonn. I cursc é ponsá por pici y gragn, cun ativités che vëgn desfirades te palestra y ince te nodadoia. Les iscri­ziuns pón fá ma online sön la plata www.uslaila.it sot ala usc »Iscriziun«. Sön la plata ciafon ince informaziuns plü menüdes sön i cursc. Por infos y assistënza por les iscriziuns pón scrí a fitness@uslaila.it

70 agn dla storia di ciavai haflinger pro le lüch »Bosc da Plan«
Ai 23 de setëmber vëgnel tigní na presentaziun di polorins dla Val Badia pro le lüch de Bosc da Plan a La Ila por festejé i 70 agn dla staziun da lascé pro i ciavai haflinger
Pro le lüch »Bosc da Plan« a La Ila vëgnel metü a jí ai 23 de setëmber na mo­stra di polorins dla sort haflinger y noricher da pert dla Uniun di ciavai haflinger dla Val Badia cun a ce le surastant Simon Dapoz. La manife­staziun mët man dales 8:30 canche düc é inviá a tó pert y podëi amiré i polorins de deplü zidladus de döta la Val Badia. Nia a cajo vëgnel tigní la mostra pro le lüch Bosc da Plan, che festejëia en chësc ann i 70 agn dla staziun da lascé pro i ciavai haf­linger.
Le lüch de proprieté dla familia Crazzolara bele da trëi generaziuns, vëgn manajé da Elisabeth che á surantut le lüch da so pere Giuvani che â tl 1953 metü man da tigní le taur haflinger por la Val Badia. En chësta ocajiun gnaral ince dé fora val’ da mangé y da bëre sides por i zidladus che tol pert sciöche ince por düc i spetadus.

Incuntada söles desposiziuns de tratamënt
La Portina por l’Assistënza y Cura dl Raiun Sozio-Sanitar Val Badia organisëia na incuntada cun la doturia Monika Voelkl che laora tl Sorvisc de cures paliatives dl ospedal da Porsenú
Tla Ciasa de Palsa »Ojöp Freinademetz« a San Martin de Tor saral la poscibilité en mercui, ai 27.09.2023 dales 15:00 inant, da ciafé consëis sön la poscibilité da stabilí y planifiché damperfora nosta orenté. La Portina por l’Assi­stënza y Cura dl Raiun Sozio-Sanitar Val Badia inivëia porchël a na in­cuntada cun la doturia Monika Voelkl che laora tl Sorvisc de cures paliatives dl ospedal da Porsenú. La doturia jará ite plü avisa söles domandes: Ci sort d’assistënza oressi pa iö ciafé? Cara é pa mia orenté? Co m’imaginëii pa iö mia fin dla vita? Olá y co oressi pa iö morí?
Dötes y düc é dër bel inviá!

La

• 
•  

View the embedded image gallery online at:
https://www.lausc.it/manifestazions-y-evenc/24889-manifestazions-atuales-speziales#sigProId4f92bba414

tragedia de Longaron
N gaujion di 60 ani dala desgrazia dla stoa de Longaron, vëniel pruietà l film »Vajont«, cun testemunianzes dl sëuravivù Bepi Vazza
La Assoziazion Carabiniers–Sezion Gherdëina, deberieda cun l Cunsëi de Furmazion, nvieia ala pruiezion dl film »Vajont«, cun testemunianzes dl sëuravivù Bepi Vazza, n juebia ai 21 de setëmber dala 20:00 tl self dl Chemun de Santa Cristina.
Tl 1963, ai 9 de utober, ie tumei bën 260 milions de metri cubich de crëp y tiera tl lech arti­fiziel. La smueia à gaujà na onda de 250 metri y ntëur n 30 milions de metri cubich d’ega à desdrù gran pert de Longaron, l luech sotite. Belau 2.000 persones à perdù la vita te chësta desgrazia.
Duc ie de cuer nviei, la ntreda ie debant.

»Cie che ne ie mei stat ne sarà mei«
La lia Tublà da Nives nvieia ala giaurida dla mostra »Was nie war wird niemals sein«, na mostra de scultures y dessënies dl artista Martin Kargruber, n vënderdi ai 15 de setëmber dala 20:00
La valeda y l crëp, l parëi y la lergia, l ëur y l’ududa. L ruf, la sfëssa y l plat. L reél y l lecort, l mparà, la desvieda y l surëdl ti lëns.
L paesc y la zità. L daviert y l restrënt. L spere…
La destanza – l vis-à-vis. La luntananza y la streda longia. L fonz sot ai piesc, l vedl y nuef. L lën y la lënia. L puscibl, l cunliamënt. La tecnica, l crëscer… La man y l ntënder.
La vijion, l tradiziunel. L cumplicà, l tëmp y i pensieres – l material. L fé, l ilujion. L costruì, l vënt y la lum tla dumbria dla nibles.
Cie che ne ie mei stat ne sarà mei.
La mostra resta davierta nchin ai 14.10., uni di dala 16:00 nchin la 19:00, de dumënia nce dala 10:00 nchin la 12:00. De lunesc iel stlut.

Pastelné da d’altonn
N curs cun Pia Pedevilla a Bornech
Al é n curs de 4 ores, por mitans y mituns dai 7 agn insö (acompagná) sciöche ince por insegnanc:ntes, a Bornech tl atelier de Pia Pedevilla tla Gross Gerau Promenade 6c.
Le terminn é la domënia ai 24 de setëmber 2023, dales 14:00 ales 18:00. Le prisc é 60,00 Euro + zirca 20,00 Euro por le material. Pastelné vëgnel corfs, idli, chirbes, ciuítes, stries, vampirs, zbergli, fonfungs, cun lëgn y materiai natu­rai (föies, perles, yii.). Le numer de partezipaziun é limité a 6, infos y prenotaziuns: tel. 348 2221745 – info@piapedevilla.com

Saus dl altonn
Por stlü jö la sajun tl’Alta Badia vëgnel metü a jí n’iniziativa liada ai produc locai y ales munts
Dai 17 de setëmber ai 1 de otober vëgnel metü a jí tl’Alta Badia l’iniziativa »Saus dl altonn«, che valorisëia i produc locai, les munts y la natüra che vëgn abelida dai corusc dl altonn. Les cater üties che tól pert al’iniziativa á chirí fora n produtur local cun so produt d’ezelënza cun chël che ai jará spo a cherié n menü. Ai 17, 18, 23 y 24 de setëmber sarál vigni iade te n’atra ütia le produtur adöm al cogo dla ütia che presentëia le produt y le taí adöm a na esperiënza parti­colara sciöche por ejëmpl n curs da cujiné o na degu­sta­ziun de vins. Les üties pón arjunje a pe, cun la roda o cun i implanc portamunt che sará en funziun cina ai 01.10. Tratan les döes edemes pón ince tó pert a ativités desvalies sciöche na jita ala descurida dles erbes aroma­tiches, iniziatives liades al monn dles ês, vijita a n lüch da paur y tröc atri apunta­mënc. Por ciafé deplü infor­ma­ziuns o por se prenoté a na escurjiun bastel jí sön la plata internet www.altabadia.org o ti ofizi turistics dl’Alta Badia.