La Usc di Ladins

En sabeda ai 8 de aost sul ciamp de balon Pradel de San Martin de Tor cater squadres de balon de la Ladinia à jià fora l Tornoi Ladin endrezà da l’ACD Val Badia. Na giornèda de balon, tradizion e sport che à vedù jièr ensema jiadores da trei valèdes: l Fascia Balon, l Fodom, na squadra che no jia te n campionat ma la jia partides via per l istà, l Val Badia che l jia te la terza categoria e la squadra Juniores metuda ensema da jiadores joegn de duta la Val Badia.
L Fascia à vent contra l Fodom per 1 a 0 (gol de Sebastiano Rasom), contra l Val Badia con 1 a 0 (gol de Alex Deluca) e contra l Juniores Badia per 4 a 0 (autogol e goi de Gabriele Lorenz, Alex Deluca e Sebastiano Rasom). »Per noi l é stat partide tecnicamenter soride – à dit Mister Alessandro Capovilla – ma a mi me enteressaa veder coche se mef la squadra, coche i fasc grop ajache ne mencia duta la linea zentrala da inant, chest an defat aon 8 neves jiadores. L Tornoi Ladin l é stat de utol ence per testar la squadra che te manco che doi setemane taca ite l campionat. Chest an aon domanà de jiar de sabeda sera e donca sarà più sorì per duc i jiadores che i arà la domenia da poder passar per so cont. Sarà n campionat senester, con 7/8 squadre che jia per venjer e donca spazies per se salvar n sarà pec, ma noi vardaron de far l possibol.«
»L é stat na bela festa, con tanta gaissa de star ensema, sport, musega e devertiment – ne à contà mister Capovilla – à paà dalbon la speisa jir fin te Val Badia. Volesse rengraziar de cher chi che à endrezà che se à metù a la leta con gran desponibilità. Se à vedù n fort sens de partegnuda. Speron de aer amò de cheste bele ocajion.«

De più tel articol su La Usc stampèda de en vender ai 14 de aost del 2026


 (Monica Cigolla)