La Usc di Ladins

»Aon abù desvaliva segnalazions de sentadins che se lamenta che l é pericolous jir sun dotrei strèdes sul tegnir de nosc comun. Per ejempie, ma no l é demò chisc: strèda Pareda, strèda de Costa, strèda Dolomites (tel zenter storich de Cianacei) ma ence ta Penìa. Sun chesta strèdes o sun vèlch toch de chestes, se veit bendeché auti che passa dalbon coran e chi che passa a pe se sent malsegures e en pericol. Enceben che sie la strisces de respet, chi che passa via strèda no se sent segur.« La taca ite coscita la proponeta de mozion sotescrita dal conseier del grop ‘Canazei Comunità e Progresso’ Alessandro Anesi e dal capogrop Luigi Marchetti e portèda dant endèna l’ultima sentèda de Consei de Comun de Cianacei chiamèda ite ai 29 de messèl.
»Nos aon dit che l é vera, che saon de chisc problemes – ne à dit l ombolt de Cianacei Giovanni Bernard – e che se empegnon a i ressolver. Te Consei aon dit che vardon de studièr la situazion, faron fèr magari n studie dantfora da nesc Polins per capir olà entervegnir e co. Te vèlch post magari metaron n semafor per chi che va a pe, più segnèi e dissuasores de velozità, magari ence na zona olache se pel jir demò sot i 10 km/h. Aon toc de strèda con situazions dalbon de pericol e per chisc ge vel troèr na soluzion. Per chest aon tout su la mozion.«

100 egn de Cianacei desche stazion de cura

Anter la variazions al bilanz de previjion l é stat metù ence na soma desponibola per n projet de valorisazion per n cedean emportant. Del 2027 defat l Comun de Cianacei festejarà i 100 egn del recognosciment del paisc desche località de cura. »Del 1917, sot l fascism, l Minister del Intern dajea fora l decret regio che recognoscea Cianacei desche »Stazione di cura, soggiorno e turismo« – ne disc l ombolt Bernard. Per nos chest aspet l à n segnificat emportant e volassane ge dèr valuta ence dal pont de veduda turistich.

De più su La Usc stampèda de en vender ai 14 de aost del 2026  (Monica Cigolla)