La Usc di Ladins

Marmolèda: l fià de la Reina
Na esperienza da viver per sentir la ousc del giacé sot noscia mans
No l é demò na instalazion da vardèr ma na esperienza da viver, la neva proponeta del MUSE tel Museo geologich de la Do­lomites a Pardac. Na ‘architetura sonora’ che nasc dai dac reèi de nosc giacé e permet de scutèr la ousc de anché pissan al davegnir, tocian con man l efet che à l in­tervent uman.
L’opera met adum la rile­vazion di sons, la enrescida scien­tifica e la produzion artistica, coscì i dac sul ambient doventa stru­menc de divul­gazion che moscia l mudament cli­matich travers l len­gaz universal di sons. »Mar­mola­da. Il respiro della Regina« l é n projet del pro­gram »Un Suo­­no in estinzione« e l é rencurà dal sound artist Sergio Maggioni con la consulenza scien­tifica del glaciologh MUSE Christian Casarotto, la colaborazion de la so­ciazion Echitonali e l sostegn de Fondazion Dolomites Unesco e Comun de Pardac. Tel meis de aost l Museo geologich de la Dolomites de Pardac é avert duc i dis con orarie 10:00-13:00 e 16:00-19:00. Info su www.muse.it

Che él Operazione Colomba?
Festa per la pasc ai 22 e 23 de aost a Pardac e Juan con volontares di Corpes de pasc e tribut a Franco Battiato
‘Evento Colomba’: na sera e na dì de cultura, musega, animazion e condivijion per dute e duc, con Operazione Colomba e Sociazion Orquidea per far cognoscer l Corp noviolent de pasc de la Comunità Papa Giovanni XXIII e sostegnir sia prejenza te la Colombia.
En sabeda ai 22 de aost tel Chino teater de Pardac (entrada

• 
•  

View the embedded image gallery online at:
https://www.lausc.it/manifestazions-y-evenc/32348-manifestazions-atuales-speziales#sigProId37faaa0a1c

debant)
da le 20:45 testimonianza de volontares su la noviolenza e la azion de n Corp de pasc
da le 21:15 conzert »Nutrire l’essenza« con ‘Le meccaniche celesti quintet’. Musega e pasc se conjobia tel tribut a Franco Battiato.
En domenia ai 23 de aost tel parch de Villa Flora fora Juan dut l dì
da le 11:00 animazion col Grop di joegn: spiegar e jiar a la pasc
da le 12:30 marena colombiana con la Coprativa Le Rais e Juliana (€ 20,00 se pel prenotar)
da le 16:00 testimonianza volontares su la noviolenza e la azion de n Corp de pasc
da le 17:30 conzert »Nutrire l’essenza« con ‘Le meccaniche celesti quintet’. Musega e pasc se conjobia tel tribut a Franco Battiato.

Mostra »con.tain #4«
L Circolo – Lia Mostra d’Ert nvieia de cuer ala mostra con.tain #4. La giaurida ie ai 21 de agost dala 20:00
La mostra se dà ju cun l adurvé su de restli y cun l pruzes de scuvierjer y trasfurmé materiai perdui o desmincëi. Obiec, manieres y situazions vën usser­vedes, tlassifichedes y trasfur­medes, per ti dé n cuntest nuef. 
La tecniches tëutes ca dala artistes y artisć ie la fotografia, la pitura, l collage, tecniches de stampa, test y nstalazion. Artisć che mët ora: Alan Biehlig, Clara Pötsch, Nele Hendrikje Sandner, Ka­tharina Schreiter y Teresa Szepes.
La mostra resterà da udëi nchin ai 13 de setëmber, ti orares de giaurida: merdi – dumënia, 16:00 – 19:00 y de sada y dumënia nce danmesdi, dala 10:00 – 12:0

Preghiera…
L Tublà da Nives nvieia a n cunzert de armonica cun poejia, n vënderdi ai 21 de agost dala 18:00
L cunzert de lirica y mujiga »Preghiera…« ie n dialogh danter la doi formes d’ert, te chël che la paroles scrites de Lino Pasquale Caccia­paglia anconta cumposizions cunesciudes per armonica, sunedes dal Maestro Matteo Facchin.
Paroles, ritm, sonn: l’ert te si essënza plu sota tol ite la forma dla poejia y dla mujiga. La ne n’ie nia mé lecort y cuntemplazion, ma n’esperienza partida danter artisć, cun l fin de dé inant la sensibltà dl’ana de chi che à scrit la mujiga y la rimes.
Avisei dala paroles y dala mujiga, unions menei te n viac che porta a recunëscer chi che on dan nëus.

Iade musical fora por l’Europa dl 17. secul
Le »Duo Riedel & Görg« se lascia aldí pro le Festival Badiamusica, en lönesc ai 17 d’agost dales 21:00, te dlijia de Badia
I dui musizisć compagns Moritz Görg (trombëta) y Michael Riedel (orghe) acom­­­­­pagnëia le publich tres n iade musical dl passé. Le program prevëiga toc por trombëta y orghe che vëgn da posć europeics desvalis dl 17. secul. N momënt par­ticolar é la presentaziun dla sonada »Fantini« dala Talia – consci­drada öna dles prö­mes com­posiziuns cone­sciüdes scrites aposta por la formaziun de trombëta y orghe. Moritz Görg sona la trombëta na­turala zënza valvoles, sciöche al gnô fat te döta l’Europa dl 17. secul.

Le Museum devënta musiga
»Sound spaces in the museum« é le titul de n conzert particolar tl Museum Ladin Ciastel de Tor, ai 21 d’agost dales 17:00 inant
Ai 21 d’agost se trasformará le Museum Ladin te n corp sonur fora por chël che an pó jí. Tres n format conzertistich straordinar, de­ventará la frabica na cassa de ressonanza y n atur: locai, stighes y passaji gnará esplorá da n punt de odüda acustich y da sintí te n’atra manira. La sëra vëgn abelida dal en­semble dl Südtirol »Chromoson«, che cun süa manira prezisa y sperimentala da soné, trasformëia les carateristiches architetoniches dl museum te musiga. I sonns nasc te posć desvalis, ai se möi tres la frabica y ti deura al publich pro­spetives nöies sön la lerch y le tëmp. Al gnará porté dant n valgönes prömes rapresentaziuns: »Toy Cow« de Andrea Ruocco por toy piano y ensemble, n laur nü de Davide Spina y n toch de Mathias Schmidhammer. Le program vëgn arichí da »Where the wild things are« tla verjiun nöia dl 2026 de Sara Carvalho y da d’atres operes. Al vëgn a s’al dé n’interaziun danter architetöra, movimënt y musiga con­temporana – na sëra te chëra che le museum instës devënta paladina y stromënt.

»The Rite Duo« a Corvara
Le Festival Badiamusica pîta en lönesc ai 24 d’agost dales 20:30 n conzert tl salf dles manifestaziuns a Corvara, cun n repertore por clavier, ince a cater mans
»The Rite Duo« é metü adöm dai dui pianisć Marco Rinaudo y Stefano Visintainer. Le duo é impegné ativamënter te na seria de proiec che tol ite le repertore por clavier a cater mans y dui claviers. 
Tl conzert podarán aldí le proiet musical »Di fontane e pupazzetti«, früt dla inrescida de repertore por clavier a cater mans de com­ponisć taliagn dla generaziun di agn Otanta dl 800 y atifs ti pröms agn dl ’900, sciöche por ejëmpl Alfredo Casella cun »Pupazzetti op.27«, »Sei Piccoli Pezzi« y »Fontane di Roma« de Ottorino Respighi. Chësc ultim program é deventé ince na realté discografica y é da ciafé sön la maiú pert di canai de streaming de musiga. »The Rite Duo« pîta regolarmënter sü laurs te posć da conzert desvalis tla Talia y ince foradecá, cun conzerc tl Portogallo, tla Spagna, tl’ Irlanda y te d’atri Paisc europeics. Ai 24 d’agost röiai a Corvara.

Festa de Santa Maria dal Ciüf a La Ila
Le paisc da La Ila organisëia la festa de Santa Maria dal Ciüf, cun na defilada dal titul »Melodies incër ciastel«
En doman sabeda ai 15 de agost vëgnel tigní la festa de Santa Maria dal Ciüf a La Ila, cun la mëssa y la prozesciun danmisdé. Dales 11:30 inant mët spo man la festa alaleria, tl pre dlungia la scora dai schi, cun le conzert dla Müjiga da La Ila. Les uniuns di Stüdafüch y dla Müjiga da La Ila se crüzia da dé fora da bëre y da mangé. 
An ciafa danterater spezialités ala grilia, polënta y tutres. Dales 13:00 inant él l’Uniun Bal Popolar Val Badia che presentará i bai tradizionai. La defilada tradizionala é dedicada en chësc ann ales »melodies incër ciastel ia« y cunta dla storia dla musiga dal 1600 insö, te deplü ambiënc sciöche te bosch, te stüa, te ciasadafüch, te ostaria y insciö inant. La defilada vëgn acompagnada dales musighes da La Ila, La Val y Albeins. 
Do la defilada pón ascuté sö le conzert dla Musiga da Albeins y da sëra sonará le grup »Woazgruiba«.

Lí te ander y workshop por mituns cun Filippo Zibordi
»Pó

• 
•  

View the embedded image gallery online at:
https://www.lausc.it/manifestazions-y-evenc/32348-manifestazions-atuales-speziales#sigProId37faaa0a1c

pa la laurs y la porsona cunvire?« se damana Filippo Zibordi, publizist, jornalist y autur de publicaziuns sura la fauna y la sconanza dl ecosistem alpin; ai 19 d’agost dales 17:00 a San Ciascian
Te n workshop por mitans y mituns nes cuntel deplü sön la laurs, le lu, le lustrel, mo ince le sciacal, la olp, le tas, la luntra, le meder y la picia belora, protagonisć de n gröm de cunties: n’ativité creativa y scientifica por imparé a conësce damí chisc carnivors alpins.
L’apuntamënt é por en mercui ai 19 d’agost dales 17:00 ales 18:30, tl Mu­seum Ladin Ursus ladinicus a San Ciascian. L’entrada é debann, i posć é limitá. Prenotaziuns al 0474 524020 o prenotaziuns@museumladin.it. Mitans y mituns cina 8 agn dess gní acompagná da n adult.

I gragn carnivors dles Alpes
Na sëra dedicada ai gragn carnivors dles Alpes cun Filippo Zibordi, ai 19 d’agost dales 21:00 tl Museum Ladin Ursus ladinicus a San Ciascian
Filippo Zibordi é publizist, jornalist y autur de publicaziuns sura la fauna y la sconanza dl ecosistem alpin. Te na incuntada d’informaziun sura la laurs rossa, le lu, le lustrel y le sciacal d’or nes cuntarál de süa presënza te Südtirol y tles Alpes y de co che i ecosistems che i partiun cun chisc tiers se müda.
Pian ia da dac ajorná sön la biologia, l’ecologia y la destribuziun, esplo­rarunse ince les desfides y les opor­tunités che le rové zoruch di gragn carnivors comporta. En mercui ai 19 d’agost dales 21:00, tl Museum Ladin Ursus ladinicus a San Cia­scian. L’entrada é debann.

Ert y musiga tl Ciastel
En vëndres ai 21 de agost él Claus Soraperra che presentëia na performance artistica tla curt dl Ciastel de Tor. Dedô conzert de Badiamusica
Tla curt dl ciastel pîta Claus Soraperra la performance Uteres / 0.3, sön le ritual y le valur trascendënt dl’ert. Cun n’in­troduziun de Gabriele Lorenzoni, storich dl’ert y curadú dla Galleria di Trento. Dedô sarál da aldí le conzert »Klangräume – Das Museum als In­strument« dl grup Chromoson, presenté da Badiamusica (ciara info a pert, sön la plata dlungia).
L’apuntamënt vëgn tigní en vëndres ai 21 d’agost. La performance de Claus Soraperra é söl program dales 17:00, le conzert dl grup »Chromoson« dales 18:00. L’entrada é debann.

»Momënc ladins« a La Val
Ai 16 de agost él n de por descurí la cultura y la storia ladina, sciöche ince les viles da La Val
La manifestaziun »Momënc ladins« vëgn me­tüda a jí ai 16 de agost a La Val, un di paisc olache an pó vire gran pert de nosta cul­­tura ladina, jon fora por les viles y les fra­ziuns dl paisc. La manifestaziun mët man dales 10:30 y an pëia ia pro la dlijia de Santa Berbura, olache al vëgn pité vijites ala dlijia y ince al ciampaní de Dlijia Vedla. L’Ostaria Vedla y la Musiga da La Val se crüzia chiló dl mangé y dl bëre. Le percurs vá inant a Ciablun y Runch y an á la poscibilité da ti ciaré ala vedla ciasa Rungg. Tles fraziuns da Ciablun, Runch y Biëi vëgnel pité spezialités ladines sides dala Uniun di Paurs che ince dai eserzizi. Sön le iade da gní zoruch pón spo storje pro pro le stont dl Parch natural Fanes–Senes–Braies, olache al vëgn cunté dla flora y dla fauna. La Jonëza da paur organisëia deplü ativités por pici y gragn y dá fora strudl da pom. L’ultima tapa gastro­nomica é pro le Lüch de Survisc, olache an ciafa deplü duciaries. Chi che ó, pó tó pert a na escurjiun cun n acompagnadú, che pëia ia dales 10:15 dal zënter dl paisc demez, sön le tru de meditaziun »Memento Vivere«.

Varieté danter tradiziun y astraziun
Mostra de Guido Tavella a La Val, daurida ai 18 d’agost 2026 dales 18:00
L’artist da La Val Guido Tavella inviëia a na mo­stra personala tl salf dles mani­festaziuns a La Val sot al tema »Varieté« cun acuarei de contrades de­pëntes da vigni sajun, portrés a öre, operes de natöra morta, tiers sal­vari, ciüfs de vigni corú y ince val’ laur speri­mental (astra­t). 
La daurida é ai 18.08. dales 18:00, la mo­­stra sará daverta spo cina ai 29 d’agost dales 16:00 ales 19:00.

Opereta ladina »Franzi«
Tl zënter d’La Pli de Mareo vëgnel presenté ciamó incö 14.8., y spo indoman 15.8. y dodoman 16.8., tres dales 21:00, la opereta ladina nöia scrita da Iaco Rigo y Alex Trebo
La regia dla opereta ladina »Franzi« é de Erika Castlun­ger, la direziun musicala de Maria Craffonara. Les ra­pre­sentaziuns é ciamó chisc dis: incö vëndres ai 14.8., indoman sabeda ai 15.8. (en Santa Maria y feragost) y dodoman domënia ai 16.8.2026, dagnora dales 21:00. Les prenotaziuns di posć söles tribünes vëgn tutes sö tres whatsapp (me­nan messaji de test o audio) y ince telefon al nr. tel. +39 393 5137302.