La Usc di Ladins

En domenia ai 9 de aost passa 300 concorenc à tout pèrt a la 49^ edizion de la 7 Mases, la corsa a pe anter i set mèjes de Soraga endrezèda da la sozietà sportiva 3Esse.

Na bela giornèda ciauda, fosc ence massa per corer, ge à fat da cornisc a la bela festa te Pra del preve olache l é stat la partenza e l travert di coridores e ence na bona marena e la premiazions viventèdes da la musega. I volontadives de la 3Esse con l president Ettore Rossi à tacà ite jà l vender à endrezèr l percors e dut chel che servia per l bon ejit de la manifestazion sportiva.

La partenza é stata entorn les 10 da doman, i concorenc é passé tal Ciock te anter doi ales de jent che ge batea la mans. Do nience mesora l é ruà i prumes, taché un su per l auter: prum Luca Ceolan de la Monti Pallidi col temp de 26’57’’, sobito vindò al 2° post l é ruà Francesco Benassù te 27’01’’ e 3° Giuseppe Vanzetta del Cermis te 27’02’’. Quarto post per Massimo Chiocchetti de la Monti Pallidi, 5° Giulian Croce de Bela Ladinia, 6° Damiano Nicolodi, 7° Luigi Sommavilla e 8° Martin Chiocchetti.

Anter eles, en dut les era 118, la doi venjidores de l’edizion del an passà les se à baratà fora la pruma doi posizions: prum post per Valeria Poltronieri col temp de 32’18’’ (l an passà 2^), 2^ Gloria Gabrielli da Pera te 34’04’’ (del 2025 l’aea vent la gara) e 3^ Cristina Zana te 35’00’’, medema posizion de la garejèda del an passà. Sobito ju dal podie l é al 4° post Giulia Pojer e al 5° Sara Deflorian de Bela Ladinia.

De più tel articol su La Usc stampèda de en vender ai 14 de aost del 2026

 (Monica Cigolla)