La Usc di Ladins

Panorama Music con mendranzes
Pea via doman 4 de messèl l program de conzerc te Fascia, da sera a La Grenz e de dì te paisc o anter i crepes
L Val di Fassa Panorama Music sporc ence chest istà na lingia de conzerc, tant a l’averta te lesc panoramics sa mont apede a refuges che a Moena, te paisc e da sera tel Music Club La Grenz.
La rassegna pea via doman, sabeda ai 4 de messèl e la jirà inant con 14 apuntamenc fin ai 25 de setember. La vegn endrezèda da la sociazion de cultura e musega La Grenz de Moena con la direzion artistica de Enrico Tommasini e la tol ite l projet JMMJ, Joegn de mendranza, musega èrt e letradura, che fèsc cognoscer gropes e musizisć ladins, fur­lans, catalans, sardes, arbëreshe e del Sudtirol, col sostegn de Region Trentin Sudtirol, Pro­vinzia de Trent, Comun General de Fascia, Co­mun de Moena, e FPB Cassa.
I prumes apuntamenc:
- ai 4 de messèl da les 21:30 al Music Club La Grenz l driz furlan ‘Scutigera’ con Gia­como Biasutti, Gabriel Pino e Julian Camilo Galindo che conjobia jazz contemporan e ritmes jungle;
- ai 11 de messèl da les 18:00 te Piaz de Sote­grava a Moena e ai 12 da les 11:30 sun Ciam­pdedie a Vich i musizisć catalans de gran valuta del ‘BWME’ (Barcelona World’s Music Ensemble);
- ai 14 de messèl da les 21:30 a La Grenz l pianist e componist jazz Alessandro Lanzoni sonarà tel Organ Trio con Edu Ribeiro a la bateria e Vinicius Gomes a la chitara;
- ai 26 da les 18:00 te Sotegrava a Moena Evi Mair Olympus band con i miores musizisć de Sud­tirol, anter chisc l ladin Max Ca­stlunger;
- ai 30 da les 21:30 al Music Club La Grenz sarà la brava cian­tautora catalana Lia Sampai.
I conzerc é duc debant, a La Grenz con tessera Arci, program sui social Val di Fassa Panorama Music e La Grenz e sul sit www.fassa.com.


Istà Dolomitich a Pardac
L Museo Geologich de la Dolomites de Pardac aur anché sia sajon rica de apuntamenc. Se pea via con la ousc de la Marmolèda
Anché vender ai 3 de messèl da les 5 domesdì vegn inaudà al Museo Geologich de la Do­lomites, te Piaz SS. Felip e Giacum a Pardac, la scomenzadives de chesta sajon da d’istà.
L rich program met dant passa 120 apun­tamenc anter esperienzes de imerscion, laboratories e vijites vidèdes per descorir la geologia e la storia de la Dolomites.
Anter la neves de chest an l é la instalazion sonora »Marmolada. Il respiro della Regina« che permet de scutèr la ousc del crep e de sie giacé travers i sons touc su diretamenter sul post, per sporjer na testimonianza contem­porana forta sul mudament climatich e ne envièr a pissèr sora a la situazion de nosc ambient e al efet de noscia azions.
L Museo Geologich de la Dolomites aur da les 10:00 a les 13:00 e da les 16:00 a les 19:00, ades dal mèrtesc a la domenia, de aost duc i dis. Con la MyMUSE Card se pel ite debant tant a Pardac che a Trent. Info su www.muse.it.


Chertes da »Urtijëi« – Muriel Senoner
L Circolo – Lia mostra d’Ert, nvieia a passé a ti cialé ala mostra te vedrina de Muriel Senoner, che sarà metuda ora dai 9 ai 19 de lugio
La stampa de chertes cun motifs de Gherdëina ie la segonda pert dl pruiet »Urtijëi?«, nvià via tl 2015 cun na tueda tl luech y na mostra persunela tl Circolo. Chësc pruiet uel analisé la perzezion dl turism da pert dla populazion. L turism de massa cun si cunseguënzes ie n fenomenn che ie deventà n elemënt che carateriseia la vita da uni di dla jënt da tlo. La cherta vën tëuta ca coche medium de comunicazion nostalgich, che ne vën nia plu drë’ nuzà ajache l vën sostituì dala dinamiches asveltes di social media. Deberieda ala chertes metudes ora tla vedrina dl Circolo, saràl nce na performance artistica te chëla che l’artista nstëssa spartirà ora la chertes tl zënter de Urtijëi. I motifs iconografics de chësta chertes ie tëuc da fotografies amatorieles dal web, lauredes ora cun i strumënc dla nteligënza artifiziela. La pultredes tol ispirazion dai resultac dla nrescida dla prima pert dl pruiet y ti dà nscila na forma visuela ala nmaginazions strambes tla respostes di zitadins.


»Gipfelstürmer« musicai
Le grup Harmonic Brass Ensemble deura la 25. ediziun dl Festival Badiamusica, ai 15 de messé sön paiun d’Al Plan
Le Festival Badiamusica complësc n chert de secul y inviëia ai 15 de messé dales 21:00 a so pröm conzert dl isté, sön paiun d’Al Plan de Mareo. Da aldí él le »Harmonic Brass Ensemble«, metü adöm da Hans Zellner y Elisabeth Fessler ala trombëta, Andreas Binder al corn, Alexander Steixner al trombone y Karl–Wilhelm Hultsch ala tuba. Sot al titul »Gipfelstürmer« gnarál porté dant n program de musiga afascinanta che vëgn da regiuns da munt de döt le monn. Y sciöche le tëmp se müda te n sarëgn sö alalt, insciö se müda ince les coordinades musicales dl grup: incherscimun, prigo, ligrëza, pié ia y tó comié. La opera prinzipala te n aran­jamënt sensazional sará la »Alpen­sinfonie« de Richard Strauss.


Perzeziuns dla natöra
Le »Cuartet mescedà« de Gherdëna sona en jöbia ai 16 de messé dales 17:00, danter i mürs storics dl Ciastel de Tor a San Martin
»Cuartet mescedà« se tlama le grup metü adöm da Katharina Lardschneider, Maria Senoner, Alex Designori y Filip Senoner, che sona en gaujiun dl Festival Badiamusica, en jöbia ai 16 de messé dales 17:00, tl Ciastel de Tor a San Martin. Cun le program »perceptions of nature«, inviëiai da esploré le spirit sonur ampl de chësta formaziun particolara metüda adöm da cor, saxofon, fabló y tuba. 
Datrai fin y calm sciöche na brisa lisiera, datrai ví y sterch sciöche n ozean furius. Mo la musiga ne pó nia ma rapresenté la natöra: al é na imitaziun cheriada artifizialmënter, n tentatif da ti dé forma a ci che la natöra é: nia da controlé o da preodëi.


Alisiré le me al brac y ales sciables
Le Consëi de formaziun Badia mët a jí n seminar, olache an pó imparé tecniches por alisiré le me. Ai 14 o ai 23 de messé a La Ila
Aste gonot me tla pert alta dl brac y tl raiun dles sciables? Spo é le seminar cun Stefanie Lepiorz Borghini n aiüt por smendrí o por tó demez chisc dolurs. Tröc problems de chësta pert dl corp vëgn dantadöt gaujá da na presciun muscolara falada y da tenjiuns fora de mosöra. Te chësc seminar pratich se darán jö deplëgn cun eserzizi por alisiré la tenjiun, cun osteopresciun lisiera y cun massaja. Le seminar vëgn tigní en mertesc ai 14 de messé (iscri­ziuns cina ai 10.07.) o en jöbia ai 23 de messé (iscriziuns cina ai 19.07), tres dales 15:00 ales 18:30, tl salf dles sentades tla Ciasa dla Cultura a La Ila. Informaziuns y iscriziuns al 388 3871597. Al é da se tó para na malieta da manies cörtes y na cogora da tennis. Implü él important da avëi les aundles de trames les mans cörtes y, sce ara vá, evité da tó ite le de dl seminar medejines cuntra le me.


Descuriun adöm la Trienala Ladina 2026
Tratan l’isté pîta le Museum Ladin Ciastel de Tor cater apuntamënc por descurí la Trienala Ladina, cun vijita menada y laboratore creatif. Pröm iade ai 9 de messé
En gaujiun dla Trienala Ladina 2026 inviëia le Museum Ladin Ciastel de Tor a n iade creatif ala descurida dl monn sonur ladin, sogan danter le rondení dl passé y dl presënt.
Na vijita menada ala mostra de ert contemporana y laboratore creatif cun Silvia Baccanti por mitans y mituns da 6 agn insö, acompagná da n adult cina 8 agn.
L’apuntamënt é por les 4 jöbies ai 9 y ai 23 de messé, sciöche ince ai 6 y ai 27 d’agost, tres da­­les 16:00 ales 18:00. Le cost é de 10,00€. Prëibel se prenoté al numer de telefon 0474 524020 o cun na email a prenotaziuns @museumladin.it


Walk in-consulënza! Al basta passé, zënza termin!
Le Sorvisc por les dependënzes dl’Aziënda Sanitara da Bornech pîta n sorvisc de consulënza por jogn, geniturs, adulc, esperc y assoziaziuns, sura alcohol, droghes, dependënza dal jüch y i.i. en colaboraziun cun le Raiun sozial Val Badia y le Sorvisc ai Jogn
Val’ iade unse domandes sura alcohol, droghes, nicotina, dependënza da jüch, gaming y social media, dependënza dal cumpré ite... Datrai se fajunse pinsiers por nos instësc o ince por n’atra porsona. Val’ iade fejel bun da nen baié en cört cun zacai. Les psicologhes y les assi­stëntes soziales dl Sorvisc por les dependënzes é chiló por os.
Ci vëgnel pa pité?
Consulënzes cörtes che dëida, ince sce an resta pro na consulënza sora;
Orientamënt y sostëgn;
Informaziuns sön prighi, consum, compor­tamënt y prevenziun;
Sostëgn por familiars y esperc;
Confidenzial, debann, anonim;
Zënza termin y zënza complicaziuns.
Al vëgn lauré cun l’atenziun sön ci che é important incö. De pici vari che pó daidé atira!
Can vëgnel pa pité?
Chëstes jöbies, dales 17:00 ales 19:00: ai 9 de messé, ai 6 d’agost, ai 10 de setëmber, ai 15 d’otober, ai 12 de novëmber y ai 10 de de­­zëmber.
Por che pa?
Le sorvisc é ponsé por: jogn – cun y zënza geniturs, adulc, familiars, insegnanc, pedagogs soziai, doturs, asso­ziaziuns y düc chi che á domandes o se fej pinsiers. Les consulënzes vëgn pitades tl local dl Sorvisc ai jogn basite, jö por stiga sön la man ciampa.


Paisc en festa a San Ciascian
Ai 8 de messé él söl program le pröm apuntamënt de »Paisc en festa« fora por le zënter da San Ciascian, cun musiga dal ví, spezialités gastronomiches y devertimënt por mituns
De messé y agost vëgnel metü a jí cater apun­tamënc cun le »Paisc en festa« tl zënter da San Ciascian. Le pröm apuntamënt é söl program en mercui ai 8 de messé. Dales 16:00 inant sarál n pice marcé de produc dl post y di artejans, y an ciafa spezialités gastronomiches pro i stonc dles uniuns dl paisc, sciöche ince pro n valgügn eserzizi dl post. 
I mituns pó se lascé depënje sö le müs y ince incunté i »rangers« dl Parch natural Fanes – Senes – Braies. Vigni apuntamënt de »Paisc en festa« gnará animé da deplü grups musicai y en ocajiun dl pröm apuntamënt ai 8.07. podarán aldí sön paiun domisdé »Julian & The D-Street band« y dales 20:30 inant Alexander Dal Plan. Domisdé sonará sön plaza dl marcé »Vic & Daniel« y dales 18:00 inant le »Arton Duo« pro le hotel Vajolet. La manifestaziun gnará ciamó metüda a jí ai 22 de messé, ai 5 y ai 19 d’agost.


Mostra de Michael Riffeser
L’artist de Gherdëna mët fora tl salf dl Istitut Ladin »Micurá de Rü« a San Martin de Tor
»Tat Tvam Asi«: chësc é le titul dla mostra de Michael Riffeser, che sará da odëi sëgn de messé a San Martin de Tor. La daurida dla mostra é söl program en vëndres ai 10 de messé dales 18:00, tl gran salf dl Istitut Ladin »Micurá de Rü«. La mostra é spo daverta dai 11 cina ai 26 de messé, vigni de dales 10:00 ales 12:00 y dales 15:00 ales 19:00.


Zënza limit – Stories de sport y de vita
Tl’Alta Badia vëgnel tigní fora por l’isté na seria de incuntades cun atlec sportifs, che cunta de sües esperiënzes de vita y de süa ativité sportiva. An mët man ai 10 de messé cun Dominik Paris
La seria de incuntades »Zënza limit« mët man ai 10 de messé cun le schiadú Dominik Paris, davagnadú dla medaia de brom tla juissa di juc olimpics Milano–Cortina. Tl salf dles manifestaziuns da La Ila cuntel de süa vita sön i schi: dales pistes plü ries de Copa dl Monn ales tëmes che an á denanco pié ia pro na gara y sües strategies. Ai 17 de agost án spo la poscibilité da incunté l’atlet de marcia Alex Schwazer, tl salf dles manifestaziuns da Corvara. Süa cariera sportiva é caraterisada da alc y basc y avisa de chësc nes cuntará Schwa­zer tratan l’incuntada. L’ultim apunta­mënt é preodü ai 11 de setëmber a La Val, cun l’atlet estrem de roda Omar Di Felice. Cun la roda él rové ti posć plü spordüs y de chëstes aventöres cuntarál tratan la serada. Les incuntades gnará tignides por talian y mët man dales 21:00, adinfora dl’ultima che sará bele dales 20:30.


Sëira dl vin a Santa Cristina
Tl raion da jì a pe a S. Cristina vëniel inò a s’l dé la sëira dl vin, n vënderdi ai 10 de lugio dala 19:30 inant
Na bela cumpëida de ciuleies dal vin de gran inuem de Südtirol pieterà da ciarcë na vela de vins de gran cualità, sun l tepih cuecen tl raion da ji a pe a S. Cristina. Leprò saràl nce mesun se maië vel’ bon bucon servì pra plu stonc sun ëur de streda.
Chëst ann uniràl sëuraprò nce pità na cërcia speziela cun n som­melier. Chi che ulëssa se nuté su o giapé plu nfurmazions, possa cuntaté di­­retamënter la Lia dl Turism de S. Cristina al numer 0471 777 800
Sambën unirà dut adum cumpanià da de bela mujiga dla grupes »Acajo« & »Lukas Insam 4tet«.