La Usc di Ladins

L é stat n moment de sodesfazion per la Scola de Fascia ai 29 de november, canche te na scontrèda online l é stat prejentà i ejic de na enrescida emportanta su l’educazion te più lengac di bec che no va amò a scola. N projet portà inant dal 2017 al 2020 te la scolines provinzièles de Cianacei e Pera e che à portà a la publicazion de n liber de gran enteres scrit dal professor Michele Daloiso.

Daloiso l ensegna didatica di lengac modergn te l’Università de Parma, l é n espert de nonzech e l era stat contatà da la Scola de Fascia per aer ponts de referiment segures per poder troèr fora n model organisatif linguistich adatà a la situazion.

A averjer l confront online, a chel che à tout pèrt zirca 90 persones da Fascia e da foradecà, l é stat l Sorastant Federico Corradini, che l à rengrazià dantfora duc chi che se à dat ju per portèr a compiment chest projet emportant: da Mirella Florian, Sorastanta canche l percors l é peà via a Vigilio Iori, che enlouta l era a cef del Ofize Ladin de Formazion e Enrescida Didatica, a dut l staff del OLFED, a la coordenadora pedagogica de Scola de Fascia Tatiana Soraperra e duta la ensegnantes che à colaborà, zenza desmentièr la Provinzia, raprejentèda da Livio Degasperi e Chiara Fedrizzi del Servije ativitèdes educatives per i picioi e ben segur i doi esperc Michele Daloiso e Luciana Favaro che à tout pèrt al grop de enrescida.


De più su La Usc stampèda de vender ai 9 de dezember.  (Lucia Gross)