La Usc di Ladins

Marz l é n meis dassen spezial: l invern l é do a fenir e sion oramai tel temp de l’aisciuda. Le giornade le scomenza a se slongiar e pian pian vegn semper più ciaut. Chest an la pecia neif e le temperature massa aute per chesta sajon à portà a la dezijion de serar na bona part di impianc jà coi 26 del meis. Per chi che vel jir a se far le ultime raide coi schi, l é amò pech temp da poder se goder!

L é chi che oramai, vedan l tempram, à jà metù te cianeva i schi, e chi che enveze fin al ultim dì i sarà su per i impianc, per devertiment o per se arcedar. Anter chisc ultimes troon i bec de le squadre de schi e i aspiranc maestres, atlec che à dezidù de far de soa pascion per l schi n lurier per l davegnir, de ensegnar chesta disciplina con gran dedizion per poder ge passar a de autre persone l gran gust che dasc far chest sport.

Podon scutar chel che me à conta na joena aspiranta maestra da Poza, Nikole Deluca, de 18 egn, e sentir da soe parole dut so gran amor per i schi. 
Apede a chi che vel doventar maestres, magari lascian lo con le garejade, anter nesc joegn troon ence atlec che somea aer na gran cariera tel mond del agonism, desche Federico Fontana da Soraga, che ai 15 de chest meis à venciù i campionac taliegn de slalom categoria Aspiranc, conferman l or del an passà te la categoria Allievi.

Podede lejer che che i à contà su La Usc stampèda de vender ai 24 de mèrz.



 (Nicole Lozzer)