La Usc di Ladins

Ai 22 de jené à la zentrela de Bulsan mandà l joler sun Plan de Corones per n nzidënt sun l purtoi. L pazient ie unì menà tl spedel de Persenon.

Riesc do àn cherdà l joler per doi pazienc a La Ila: l prim ova plu dessegur l os dla cuessa rot, l segondo sangunova dassënn da la giama ajache l se ova taià cun l schi.
Pra l terzo ntervënt se tratòvela de na emergënza sanitera: n’ëila de Santa Cristina ie unida meneda dal’ambulanza tla sënta a Puntives. Do na prima valutazion la àn meneda tl spedel de Bulsan.
Daldò mo n cuarto ntervënt sun l purtoi dl Valon, per n’ëila che se ova rot la giama–meneda tl spedel de Burnech, ulache n à nce menà n ël che n fova jic a tò sa la Utia Saraghes ajache l fova tumà y se ova rot na giama.

Ai 23 de jené iesen muec riesc dala 9 de viers de Badia per n ël de Milano che ne se n stajova nia bën. L dutor à udù che l ova problems cun la zirculazion y à perchël tëut la dezijion de l mené tl spedel de Burnech.
L segondo ntervënt dl di àn fat sun Ciampinëi, ulache n jëunn de 24 ani se ova trat na sciabla ora de luegia. Sambën òvel n drë’ mel–n ti à perchël dat zeche decontra y ie pona julei limpea tl spedel de Persenon.
Per l terzo ntervënt iesen julei su insom dl lift de Santa Crusc–ilò se ova n seniëur dla Danimarca de 65 ani rot na giama. Ël ie unì menà tl spedel de Burnech.
Puech dan la 20:00 à la zentrela cherdà per na levina che fova unida ju sun Jëuf de Sela, plu avisa sot ala utia Valentini. N à riesc cherdà nce i Judacrëp de Gherdëina y dl’Auta Fascia. Cun l joler iesen julei sëura la luegia, per cunstaté riesc che l ne fova deguni da udëi. N udova truepa piedies che juva ju de viers dl purtoi. Do diesc menuc à cherdà su la zentrela de Trënt dijan che la grupa de 6 persones fova tl lëur de jì ju da sëui: per fertuna ne se ova deguni fat mel o ruvà sot ala levina.