La Usc di Ladins

N lunesc ai 24 de fauré sun l tert danmesdì à la ambulanza menà n pazient, che fova tumà te hotel y se ova rot na sciabla y n uf, tla sënta dl Aiut Alpin de Puntives. N ie julei limpea tl spedel de Persenon. Da iló ie l joler dl Aiut Alpin julà sun Jëuf de Sela, ulache n ël se ova fat mel a jì cun i schi. N l à menà tl spedel de Persenon.
Domesdì ie mo n iede ruveda la ambulanza tla sënta dl Aiut Alpin, chëst iede se tratòvel de n’ëila che ie unida da nescia, povester per gauja de na alergia. L dutor à riesc cialà de fé velch y n l à pona meneda cun l joler te spedel a Bulsan. L Aiut Alpin ne n’à nia abù dl’aurela de furné de reviers tla sënta, davia che n à messù julé sun l Lagazuoi ulache n’ëila ie tumeda cun i schi y se à rot na sciabla. N l à ciarieda sun l joler y meneda te spedel a Burnech.
De ndut cater ntervënc iel stat n merdi ai 25 de fauré, trëi de chisc tla valedes ladines. Da marënda ie l joler unì cherdà via n Edelweis ulache n jëunn ova abù n atach epiletich. Do la prima medicazions àn pudù l lascé cun i siei de familia. Daldò iesen julei a San Ciascian per mené n ël dl luech cun problems al cuer te spedel de Burnech. Do la sies da sëira ie na seniëura, che se à rot n uf sun Secëda, unida meneda tla sënta dl Aiut Alpin y da iló cun l joler te spedel de Persenon.

De plu tla edizion stampeda de La Usc di Ladins o sun l e-paper a paiament www.lausc.it/e-paper