Marco Liberatore: Descombaton l virus desche se fossassane na squadra de hockey

Data

27 de auril 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L diretor tecnich del setor di joegn di Falcons ne conta de sia esperienza e de sia prospetives dò l prum an de lurier te Fascia.
La sajon 2019/2020 à portà de outa a cèsa Marco Liberatore, arcedador clasc '67 de gran nonzech che à arjont sie maor travert con la nazionèla talièna senior de la eles, canche l'é stat bon de venjer l Mondièl del 2018 a Asiago.

N prum an pien de emozions
Dò esser stat responsabol del projet Hockey Academy de Busan, al scomenz de la sajon passèda Marco Liberatore l'é vegnù te Fascia, olache l'à tout sù l'encèria de diretor tecnich del setor di joegn di Falcons. L lurier l tol ite duta la categorìes da l'U.7 a la 19. I obietives i é desvalives aldò de l'età di bec, ma a duc ge vel semper ge garantir l mior ambient, n lech de crescita e formazion. »Chest prum an al Scola – ne à dit Liberatore - l me à dat n muie de emozion positive. L'é stat da lurar perché é volù portar mia filosofia, me é ciareà de responsabilità perché ge tegnìe a far dalvers. Posse dir che da l'U.7 a la 15 l'obietif de crescer tecnicamenter, de far grop e far devertir i bec l'é stat più o manco arjont. No son enveze sodesfat del lurier fat te l'U.17 e 19 olache se à creà condizion de jech e alenament che no me à piajù«.

Esperienza al servije di joegn Falcons
Esperienza, chesta la parola d'orden de l'arcedador fascian che mai vel se desmentièr chel che l'à fat, sie percors, per poder esser de utol a chi che ge stèsc apede, ades, te la neva aventura fascèna. Esperienza che dèsc l met de fèr confronc con etres lesc e autres realtà, esperienza da meter al servije de chi che vel emparèr l mestier de arcedador e, soraldut, di joegn che à l'ensomech de doventèr hockeysć. »É śirà n muie de sozietà e vigniuna à soe particolarità: chiò é troà n ambient beliscim, desponibol e famà de emparar. L'é nasciù na atmosfera familiara e col respet de le part. Duc i alenadores i à abù gust de aer zachei che ge dijesse co far le robe, i à abù gran gaissa e piajer de aer diretive: chest l'é n muie positif e l se respieia sui bec«.

Se pel lejer de più su La Usc stampèda de vender ai 24 de oril 2020. 




 (Daniele Verra)