La sajon 2020/2021 l’é stat per l Fascia na sajon de mudament con l salut de l’Head Coach Teppo Kivela, su la panca fascèna dal 2017, e l retorn de Marco Liberatore, arcedador fascian che tant delvers l’à fat dalonc da sia val. La fin de n zicle per i Falcons, l scomenz de n nef te n moment dassen senester, chel del Covid, che enceben l bon ejit del campionat de Alps Hockey League, l’é stat scialdi na burta ombria de prescion su duta la squadres.
L prum an per n alenator l cogn esser sessaben de cognoscenza e costruzion, la basa per n temp più lonch che posse desfrutèr l prum lurier dejout. La conferma de Liberatore no la é amò ruèda, en cont de chest se speta neves da la sozietà che podessa ruèr jà endèna che sion en stampa, per n pas che cognessa esser giust e nauturèl per ge dèr continuità al projet e a n grop che à desmostrà de poder arjonjer obietives più auc.
A la fin del campionat amò en cors con la finèles, l Fascia l se à troà al 13° post en classifica de AHL, a n soul post dai pre-playoff, dò che ence le Final Four del campionat talian IHL-Serie A les era desvanides per na soula piaza. Na sajon jièda dassen ben, con na squadra n muie joena e locala, n jech che a rezevù compliments da più pèrts e l soul defet, tinultima dezisif, de segnèr massa pech. Apontin con Coach Liberatore aon volù fèr na analisa de la sajon.
Duta l'intervista é da poder lejer su La usc stampèda de vender ai 16 de oril.
(Daniele Verra)
