La Usc di Ladins

En domënia ai 27 de jügn él sté a Ratschings la pröma ediziun dl »Ratschings Mountain Trail«, gara da salté che se desfira tres n percurs de 17,7 chilometri cun n deslivel de 950m. I atlec, döt adöm 133 ëi y 58 ëres, é piá ia da mesa les nü da doman pro la staziun a val dl lift che condüj sön la Rinneralm, a 1830 m, olache al ê le travert. Davagné á tla categoria di ëi Armin Larch cun n tëmp de 1:22:55. Al secundo post é rové Emanuele Manzi y al terzo post s'á plazé l'atlet da La Ila, Luca Pescollderungg, che é rové al travert cun n tëmp de 1:26:41. Tla classifica M30 é Luca pröm. I atri atlec badioc che á tut pert ala gara é Martin Kostner y Giovanni Trebo, che é rová al 37. y al 38.ejim post, al 12. y 13. post tla classifica M30. Da Gherdëna á tut pert Klaus Rabanser di »Gherdëina Runners« che s'á plazé al 80ejim post tla classifica generala y al 15.ejim post tla classifica M50.

Por ci che reverda les ëres, á davagné l'atleta todëscia Michaela Schmeer, cun n tëmp de 1:47:14, secunda é rovada Edeltraud Thaler y terza Lina Kronschnabl, ince ëra atleta todëscia. Manuela Perathoner di »Gherdëina Runners« é rovada 24ejima tla classifica generala y 4. tla classifica F50.

En sabeda sarál spo la "Ladinia Trail", gara da salté che pëia ia da San Martin y röia sön la Plose tres n percurs de 29 km cun n deslivel de 1850 m. Chësta gara fej pert dla "Brixen Dolomiten Marathon".  (kp)