La Usc di Ladins

Nience chesta outa no la va per l Fascia balon, che l pert per 1 a 3 l derby contra la Dolomitica de Pardac, jià fora sul ciamp Benatti de Moena zenza publich. 

La endesfida la scomenza con la Dolo che tol te man l jech ma zenza ge dar problemes a la defendura fasciana. Pian pian Trottner e compagnes ciapa semper più teren e tel mez del prum temp i risćia de segnar con Massimo Lorenz che, do na gran trata de Sebastiano Rasom, l se troa contra l portier ma no l é bon de ciapar l usc. 

La seconda part de la endesfida la taca mal per i bec de mister Cigolla che do 7 menuc i ciapa l gol, ma no i se peta ju e i proa a drezar la partida e al 30’ del secondo temp i é bogn de la drezar con Gianni Riz, l più en forma de chest scomenz de campionat, che l met l balon junsom al sach do na burta rebatuda del portier pardacian. 

De più informazions, con classifica e resultac de la squadres mendres, su La Usc stampèda de vender ai 24 de setember.  (Pierpaolo Rasom)