La Usc di Ladins

I eies fascegn i era ponté anché dadoman da mesa les 8, ora talièna, su la garejèda de Snowboard Cross de la eles do che te la net l’atleta ladina Caterina Carpano se aea calificà zis ben con l’11° temp te le seeding run.

E coscita, puntuèla, Caterina se à prejentà al start di otaves de finèla te la sesta bateria de atletes, dessema a la franzousa Julia Pereira de Sousa Mabileau, a la russa Ekaterina Lokteva Zagorskaia e a la compagna del team Azzurro Francesca Gallina. L’atleta fascèna é pontèda via sobito delvers te la spenta e l’à dapodò desfrutà ben sia gran velozità. La run à vedù na gran batalia anter Carpano e la franzousa Mabileau per l prum post, con n corp a corp che ge à dat tinultima rejon a l’atleta transalpina. Ma nesciun dan, la fascèna seconda e loghèda ai chèrc de finèla.

L é stat enlouta che noscia snowboarder à cognù se la veder te na terza bateria dassen senestra, che vedea ence la canadeisa Meryeta Odine, la russa Alexandra Parshina e amò la franzousa Mabileau. Con la gaissa data da la calificazion ai chèrc, Caterina la no se à aboncont tirà en do, e l’à dat l dut per dut con l ensomech de la semifinèla. La garejèda metuda en pe da la fascèna la é stata dassen spetacolèra: con la canadeisa Odine che à sobito vadagnà mingol de vantac, gran batalia l é stat amò anter Carpano e Mibeleau, con na mesa proa coreta a pec metres con despasc e contra-despasc. 

Do aer perdù mingol de velozità te n pian aboncont, la fascèna no à più abù l met de arjonjer la seconda piaza, e l’à coscita cognù azetèr l’eliminazion.

L’atleta ladina é vegnuda fora aboncont più forta da Pechin 2022, do aer desmostrà la capazità de verejèr ai livìe olimpics zenza dificoltà. Sie salut a la telecameres coi brac lèrc, desche a dir «nia da fèr, chest’outa la é jita coscita» l é n segnèl per l davegnir: chest’outa la è jita coscita, ma chela che vegn…  (Daniele Verra)